Tres les precipitaciones d’esti miércoles pela nueche, la previsión del tiempu n’Asturies para esti xueves depara unes condiciones meteorolóxiques relativamente estables anque, comoquier, nun se refuga que dalgún orbayu pueda escapase mientres la mañana en zones de la mariña. Polo xeneral, vamos tar falando de nubes y escamplaes a lo llargo de prácticamente tol día. Los vientos van soplar de componente oeste con raches moderaes na mariña y fluexes nel interior.
Les temperatures máximes van baxar nel sector occidental y en zones altes del cordal. Esti descensu va ser d’hasta 2 ºC menos qu’esti miércoles. Les mínimes, pela so parte, van baxar de forma xeneralizada ente 1 y 2 ºC en tol Principáu d’Asturies.
El vienres tamién vamos encarar un día estable con intervalos nublos y una probabilidá bien baxa o inesistente de precipitaciones. Los vientos van siguir predominando de componente oeste con raches daqué más significatives na mariña. Ello ye que espérase que l’Axencia Estatal de Meteoroloxía active l’avisu marítimu de nivel mariellu pola posibilidá de raches fuertes hasta les 14 hores. Tocantes a les temperatures, van xubir tanto les máximes como les mínimes.
El sábadu va ser el día más templáu de la selmana con rexistros d’hasta 30 ºC nel interior asturianu. Comoquier, ye bien probable que les agües lleguen na madrugada del sábadu al domingu y baxen les temperatures de cara a la xornada dominical.
