Barbón inaugura la 68ª edición de la Feria Internacional d’Amueses d’Asturies con un llamamientu al alcuerdu pol resurdir industrial de la comunidá. El presidente sorraya la garantía de suministru eléctricu como “la llave de camín para la reindustrialización d’Asturies” y reclama unidá institucional para consolidar la crecedera económica del Principáu. Actualidá Asturies
Na so intervención, sorrayó la necesidá de garantizar el suministru enerxéticu como “llave de camín para la reindustrialización d’Asturies”, de la qu’aportunó na importancia estratéxica del aníu central de la rede eléctrica para asegurar el desenvolvimientu de proyectos empresariales en zones clave como El Musel.
“El suministru eléctricu resulta básicu para Arcelor, para Asturiana de Cinc, para la industria yá instalada, pero tamién para la que deseya asitiase nel Principáu”, afirmó’l xefe del Executivu, quien señaló que la comunidá ta «cargada de bones razones» para amosase esixente nesta materia. Nesti sentíu, llamentó “la irresponsabilidá de quien refugaron les midíes previstes nel decretu llei antiapagones”, que van suponer un perxuiciu económicu para les grandes empreses asturianes.
Mientres el so discursu, Barbón realizó un balance de los sos seis años de gobiernu nel que valoró trés indicadores clave: la meyora del mercáu llaboral, la meyora nes comunicaciones y l’impulsu económicu deriváu de l’atracción d’inversiones. “El gran fechu d’esti períodu ye’l tresformamientu d’Asturies”, señaló, para recordar que “la última entrega de la Encuesta de Población Activa asitia al Principáu a la cabeza de la creación d’empléu”.
Nel ámbitu de les infraestructures, reclamó’l cumplimientu íntegru del plan de cercaníes ferroviaries y l’aceleración del Corredor Atlánticu, según la execución del plan de víes de Xixón. “L’Asturies de güei, que ye l’Asturies hiperconectá, rique que se cumplan los compromisos adquiríos”, indicó.
El presidente tamién espresó la so esmolición pol retayu previstu nel presupuestu de la Política Agraria Común (PAC) para’l periodu 2028–2034, y encamentó a la Comisión Europea a “entainar l’aplicación de les midíes de protección de la industria comuñal y, cuantimás, de la siderurxa”. Sobre esti asuntu, reclamó xuna “reacción rápida y enérxica” énte’l caltenimientu de los aranceles estadounidenses sobre l’aceru y l’aluminiu.
Barbón concluyó la so intervención con un llamamientu a la unidá institucional y social: “Güei, nel estrenu del nuevu sieglu de la Feria d’Amueses, llámo-yos a un alcuerdu pol resurdir d’Asturies”. Estimó’l trabayu de los organizadores del certame, qu’anguaño axunta a 720 espositores y barganal de 2.200 marques, y destacó el calter especial d’esta edición, la primera que se celebra tres la reconocencia de la cultura sidrera asturiana como patrimoniu cultural inmaterial de la Humanidá per parte de la Unesco.
“Esta feria ta de restallu”, afirmó’l presidente, de la que convidó al públicu a visitar l’estand institucional del Principáu, dedicáu a la cultura sidrera como seña d’identidá d’Asturies.
