🪐 La conseyera de Cultura, Política Llingüística y Deporte, Vanessa Gutiérrez, participó güei n’Uviéu na inauguración del 📺🔦
Uviéu viaxa al futuru con LINK 2025: esperiencies inmersives y arte dixital hasta’l domingu. Instalaciones audiovisuales y esperiencies de realidá estendida enllenen l’antigua Fábrica d’Armes de La Vega. El LINK va allargase tou la fin de selmana, hasta esti domingu.
Uviéu vive dende esti vienres la sesta edición del Circuitu d’Esperiencies Culturales Insólites (LINK), un festival centráu n’instalaciones audiovisuales y esperiencies de realidá estendida, un eventu que tien llugar na Aantigua Fábrica d’Armes de La Vega, con accesu pol portón a la fin de la cai Marcelino Fernández. Tolos conteníos del LINK Festival son gratuitos, con aforu llindáu y accesu per orde de llegada, sacantes les esperiencies de realidá estendida, que riquen inscripción previa na cortil el mesmu día de la sesión. Los horarios del festival pa esta fin de selmana son: sábadu 30 y domingu 31 d’agostu, de 11:00 a 14:00 y de 16:30 a 22:30 hores.
Ente les instalaciones audiovisuales destaquen Hint, del colectivu italianu SPIME.IM y l’artista Akasha, y LifeForm, del artista canadiense Herman Kolgen. Estes obres, esibíes en festivales internacionales como Ars Electronica, Mutek o la Bienal de Venecia, esquicen la relación ente’l ser humanu, la tecnoloxía y la percepción del mundu.
Ye un estímulu que nos convida non solo a esperimentar y a ver cómo dialoguen distintos enclinos, distintos artes, sinón tamién a cavilgar sobro temes acucioses qu’esmolecen a la sociedá. Ye un arguyu que la cultura actúe un motor, amás, de consensu, de diálogu, de pensamientu, tamién de producción, un motor económicu tamién, por qué non y más nun enclave tan singular y maraviyosu como yá esta Fábrica onde convive’l patrimoniu históricu col patrimoniu industrial y agora vamos poder ver les nueves tecnoloxíes tamién , una propuesta accesible a tolos públicos, gratuita, pa toles persones de toles edaes, que se van a sentir de xuru apellaes por estes propuestes “.
José Castellanu, el Director de LINK, especificó: “Esta ye la sesta edición de Link, un festival que llamamos un circuitu d’esperiencies culturales insólites porque lo que queremos ye averar a la xente un tipu d’esperiencies culturales y d’actividaes que de normal non se ven nel día ente día. N’Asturies y n’España hai bien pocos festivales que trabayen nestos llinguaxes. Tenemos dos naves.
N’una d’elles tenemos cuatro instalaciones, cuatro pieces de realidaes estendíes que se ven con gafes de realidá virtual y depués tenemos dos instalaciones audiovisuales de gran formatu. Tamos trabayando con artistes, sobremanera europeos, tamién norteamericanos y alliniándonos colo que ye la candidatura d’Uviéu a la Capital europea de la cultura de 2031. Ye verdá qu’esto yá llevábamos trabayando nesta llínea dende les primeres ediciones pero agora intentamos reforzar esa parte d’esta candidatura a la capitalidá”. Castellán esclarió que “tou esto va camudando enforma d’un añu pa otru y anguaño les esperiencies son más llargues. Tamos pasando yá d’un formatu casi videoxuegu, a un formatu más documental, casi son películes en realidá”.
La organización aumentó’l númberu de dispositivos pa facilitar l’accesu del públicu y encamienta retirar los tickets al entamu de cada sesión. La edá mínima pa participar nes esperiencies de realidá estendida varia ente 12 y 18 años según la propuesta. LINK 2025 forma parte de la programación de branu de la Fundación Municipal de Cultura d’Uviéu y refuerza la ufierta artística venceyada a la candidatura de la ciudá a Capital Europea de la Cultura 2031. El festival cunta cola collaboración de Caxa Rural d’Asturies al traviés del so Fondu d’Educación y Promoción.
