Hai fiesta de Les Piragües para ratu: la regata infantil del Mini Sella, con más de 400 palistes, demuestra qu’hai cantera. Alberto Llera, coordinador de la prueba: «Cada añu tenemos más participación; siempres creciendo, adulces».
Ribesella vivió esti miércoles una de les sos xornaes más entrañables y animaes dientro de la Selmana de les Piragües cola celebración de la XX edición del Mini Sella, la regata infantil que cada añu gana más adeptos y que se convirtió en tou un símbolu de la cantera del piragüismu internacional.
Más de 400 palistes d’hasta 14 años tomaron parte d’esta prueba, representando a más d’una trentena de clubes procedentes de toa España, pero tamién d’otros cuatro países: Arxentina, Irlanda, Alemaña y Portugal. Los chavales remaron al sol nun ambiente de competición, pero sobremanera de compañerismu y deportividá.
La regata na ría del Sella, en Ribesella, con un percorríu de 3.500 metros dende los Campos d’Oba hasta la ponte de la villa para les categoríes alevina ya infantil, amenorgáu a 1.500 metros dende El Peñón hasta la mesma ponte para los redrueyos y prebenxamines.
Les condiciones del ríu nun lo punxeron fácil a los participantes: «Debíu al escasu caudal del Sella y a un coeficiente de marea amenorgáu, el percorríu presenta mayor dificultá técnica en dellos tramos», esplicaba la organización primeramente a la prueba. Aun así, l’entusiasmu de los palistes superolo tou.
Ente los más rápidos, destacaron les trés primeres piragües de K2, que cruciaron la meta casi al empar y en menos de 13 minutos.
L’oru foi pa la pareya del Uviéu Kayak, Adrián García Camiña y Álvaro Fernández Fiuza, que repitíen la esperiencia con ésitu: «Este ye’l nuesu tercer o cuartu añu participando. L’añu pasáu yá ganamos na nuesa categoría y quedamos terceros na xeneral», cuntaben, «la verdá ye que la esperiencia ye bien bon, añedíen».
Ribesella acueye’l XX Troféu Mini Sella con 323 palistes / J. Quince
Tamién del Uviéu Kayak salieron les campeones femenines nesa mesma categoría de K2, Mireia Isoba Suárez y Sara Figareo Álvarez, na que foi la so primer participación xuntes: «El ríu diba un pocu secu, hubo dalgún momentu que nos costaba, pero tuvo xenial», afirmaron con una sorrisa les palistes n’algamando la meta.
Esti eventu cumple yá dos décades dende la so creación. Foi escurríu por Carlos Piélagos, exalcalde del conceyu y reconocíu árbitru nacional de piragüismu: «Recuerdo aquel añu que nos asocedió faer una prueba de promoción colos neños asonsañando lo qu’asocedía nel Sella», remembraba. «Tuvimos qu’engarrar enforma, pero toi bien contentu de que cada añu vaiga a más», el riosellano de Collera.
Güei, l’alma del Mini Sella ye’l palista local Alberto Llera, responsable de que tou funcione a la perfección y quien coordina la competición dende’l Club de Piragüismu El Sella, en collaboración col Conceyu de Ribesella y diverses asociaciones del conceyu. «Cada añu tenemos más participación, afortunadamente; siempres creciendo, adulces. Como novedá anguaño tenemos cuatro países estranxeros participantes», apuntaba.
La xornada arrincó col pregón, que corrió al cargu de la canoísta internacional Antía Jácome, quien se sintió bien honrada de dar la salida a los más nuevos nun añu nel que va participar per primer vegada nel Descensu Internacional del Sella, que se va apostar esti próximu sábadu, ente les pontes de Les Arriondes y Ribesella.
Volviendo a la carrera d’ayeri, tres l’esfuerzu, llegó’l pagu: un aperitivu pa los pequeños deportistes y el siempres esperáu y coloríu desfile poles cais de la villa riosellana, acompañaos pela Banda Gaites Ribeseya» y los carismáticos xigantes y cabezudos Pinón, Telva y Pinín, del grupu folclóricu «Entaína».
El broche púsolu’l tradicional izáu de banderes autonómiques nel paséu de los Vencedores del Sella. Si pela mañana rellumaba la cantera de piragüistes, pela tarde sería la vez de la cantera piragüera, colos más pequenos participando n’unu de los actos más emblemáticos de la selmana. Ente los encargaos d’enseñalos taben los hermanos Matías y Manuela Santaclara Sánchez, afatiaos col icónico chalecu coloráu, n’alusión al conceyu local, y bien ilusionaos por participar: «Ayudamos a xubir la bandera, yá lo fiximos otros años, ye risonderu», dicíen.
Nun faltó’l respaldu institucional cola asistencia de representantes de los conceyos riberanos del Sella, como l’alcalde de Ribesella, Paulo García, al pie de los conceyales Alejandro Alonso y Pablo García; de Parres, el so rexidor Emilio García Longo y el conceyal Álvaro Palacios; l’alcalde de Cangues d’Onís, José Manuel González Castro; según la conceyala Irene Carreño, en representación de Piloña. Tamién tuvo presente’l presidente del CODIS, Juan Manuel Feliz.
