Conexón Asturies va amosar los preparativos y los nervios de los xixoneses. TPA va retresmitir esta nueche en directo l’espectáculu de lluz y color de los fueos artificiales de les fiestes de Begoña 2025.
L’equipu de Conexón Asturies con Marco Rodríguez dende’l plató va llevar a les cases de tolos asturianos el mayor eventu pirotécnicu del branu xixonés que va correr al cargu de la reconocida empresa Pirotecnia Zaragozana, que repite per tercer añu consecutivu.
A pie de cai y a pie de sablera van tar Cecilia Iglesias y Saúl Montes pa vivir colos xixoneses y toos aquellos que visiten la capital de la Costa Verde los minutos previos al espectáculu que va dar entamu a medianueche.
La disposición de les cámares en distintos puntos de la ciudá y en distintos allugamientos escoyíos poles sos vistes va dexar siguir l’espectáculu pirotécnicu como si tuviéremos na mesma sablera. Dende’l Náuticu hasta Poniente.
L’equipu de Conexón Asturies va amosar en primer persona los preparativos y los nervios de los xixoneses y de los miles de visitantes qu’esa nueche vayan hasta la villa de Xovellanos. Amás vamos baillar al ritmu d’Assia na fiesta previa al espectáculu pirotécnicu que va siguir cuando remate la descarga final.
23 minutos de son y color na gran Nueche de los Fueos de Begoña
- La empresa Pirotecnia Zaragozana foi, per tercer añu, la encargada de llanzar los fueos
Decenes de miles de persones esfrutaron en Xixón de la nueche de los fueos artificiales. Ficiéronlo cabo la playa de San Llorienzo y otros puntos de la ciudá.
A les 00:00 empezaben 23 minutos de son, lluz y color pa los que fueron necesarios 1.600 quilos de pólvora. La empresa Pirotecnia Zaragozana foi, per tercer añu, la encargada de llanzar los fueos de la viéspora del Día de Begoña dende L’Atalaya.
Unu de los acontecimientos más importantes del branu xixonés, que tamién pudieron siguir per TPA.
