Barbón: “El presupuestu de 2026 va ser el de la educación y el de la prevención énte emerxencies”. El xefe del Executivu sorraya que la inversión constante del Gobiernu d’Asturies llogró crear “unu de los meyores sistemes públicos d’España”, que dexa al alumnáu estudiar de baldre dende la etapa de 0 a 3 años hasta rematar la Universidá. Actualidá
El presidente del Principáu, que güei participó en Nava na inauguración oficial del cursu nes etapes preuniversitaries, asegura que se va xixilar el cumplimientu de tolos finxos del pactu Asturies Educa “en tiempu y forma”
El presidente del Principáu, Adrián Barbón, participó esta mañana na inauguración oficial del cursu escolar en Nava, onde reivindicó la inversión sostenida del Gobiernu d’Asturies pa crear “unu de los meyores sistemes públicos d’enseñanza d’España”, que dexa al alumnáu estudiar de baldre dende los sos primeros meses hasta rematar la Universidá. Tamién avanzó que’l presupuestu autonómicu de 2026 va ser “el de la educación y el de la seguridá y la prevención énte emerxencies”.
“Ye un arguyu dicir que’l Gobiernu d’Asturies invierte’l dineru nesto, n’apostar por una educación pública calidable”, valoró.
Barbón refirióse al Pactu Asturies Educa, suscritu en xunu colos sindicatos docentes, que va movilizar un gastu de 45 millones nos próximos años pa reforzar la educación pública. Nesti sentíu, comprometióse a velar por que los finxos incluyíos nel documentu puedan cumplise “en tiempu y forma”.
Amás, aseguró qu’Asturies “abre camín” pa otres comunidaes, con iniciatives como la creación de la rede pública, autonómica y gratuita de Les Escuelines/As Escolías o la decisión d’enllantar dende esti cursu la gratuidá de la matrícula universitaria.
Mientres la so visita a Nava, el xefe del Executivu visitó’l Colexu Públicu San Bartolomé, l’Institutu d’Educación Secundaria Peñamayor y el centru de primer ciclu d’Infantil, incluyíu na rede de Les Escuelines. “La educación ye l’ascensor social y la pilastra básica pa la construcción d’un mundu más xustu”, sorrayó.
Na imaxe, el presidente del Principáu, Adrián Barbón, saluda a un grupu d’alumnos y alumnes del Institutu d’Educación Secundaria *Peñamayor, con motivu del entamu del cursu escolar.
