Borja Sánchez anima a los estudiantes a formase en disciplines de ciencia, arte y tecnoloxía. El conseyeru de Ciencia destaca’l proyectu de la Fundación Margarita Salas y la Fundación Caxa Rural para fomentar les vocaciones científiques ente alumnáu de la cuenca minera del Caudal. Reel / Actualidá Asturies
Borja Sánchez sorrayó la importancia d’impulsar proyectos que fomenten l’interés pola ciencia ente los más nuevos, animándo-yos a formase en disciplines STEAM (Ciencia, Tecnoloxía, Inxeniería, Artes y Matemátiques), “porque son la base de la mayoría de los empleos del futuru”.
El conseyeru participó na presentación del proyectu Art is (a) Mine: la ciencia de la mina y la so espresión artística, una iniciativa conxunta de la Fundación Margarita Salas y la Fundación Caxa Rural d’Asturies, que s’espón nel Pozu Santa Bárbara, en plena cuenca minera asturiana. L’oxetivu ye claru: espertar vocaciones científicu-tecnolóxiques al traviés de la fusión ente arte y ciencia.
Abargana d’un centenar d’estudiantes de 3º d’ESO de los IES Valle d’Ayer (Moreda) y Valle de Turón (Turón) trabayaron mientres meses en proyectos que combinen investigación científica y espresión artística.
Mientres la presentación, el conseyeru tuvo acompañáu por Lucía Viñuela, presidenta de la Fundación Margarita Salas; Eva Pando, directora de la Fundación Caxa Rural d’Asturies; y l’alcalde de Mieres, Manuel Ángel Álvarez. Toos pudieron conocer de primera mano los trabayos realizaos pol alumnáu: vídeos, cómics, instalaciones audiovisuales ya inclusive un grafiti en directu cola imaxe de Margarita Salas.
