✒️L’autora (Cangues d’Onís, 1995) ye profesora; graduada con minor n’asturianu; collaboró en Formientu; premios en «Entaína a escribir» y «Qué guapo ye querese»; participó tamién en Sentir Asturies (RTPA) y la plataforma Play Presta.
Claudia Gutiérrez Lueje (Cangues d’Onís, 1995) ye la ganadora de la quinta edición del Premiu Enriqueta González Rubín de narrativa nueva n’asturianu, que promueve Conseyería de Cultura, Política Llingüística y Deporte. La so novela Diariu indecente d’una docente foi reconocida pol xuráu del galardón pola so bona construcción dende’l puntu de vista formal, l’equilibriu na so estructura y la so naturalidá espresiva”. El xuráu valoró, amás, l’altu nivel xeneral y la diversidá de les obres presentaes. LNE
Dichu xuráu taba formáu por Blanca Fernández Quintana, escritora y profesora, Sofía Fernández Castañón, escritora y realizadora audiovisual y Llucía Menéndez Suárez, filóloga y profesora. El director xeneral d’Acción Cultural y Normalización Llingüística actuó como presidente y Laura Marcos, filóloga adscrita al Serviciu de Planificación y Normalización Llingüística, como secretaria.
La nueva escritora presenta un relatu amenu ambientáu nel viaxe d’estudios d’un centru de secundaria.
El premiu Enriqueta González Rubín de narrativa nueva n’asturianu ta dotáu con 3.000 euros. El Gobiernu d’Asturies impulsó’l galardón en 2021 para reconocer el talentu de la producción lliteraria de les nueves voces de la lliteratura en llingua asturiana. Nes sos ediciones anteriores, el premiu recayó en Blanca Fernández Quintana, Andrés Fernández Menéndez y Beatriz Quintana Coru.
El Premiu de Narrativa Nueva n’Asturianu lleva’l nome de la escritora riosellana Enriqueta González Rubín (Santianes de Molenes 1832), autora de la novela ‘Viaxe del tíu Pacho el Sordu a Uviedo’ (1875), el primer trabayu en prosa que se conoz escritu en asturianu.
Claudia Gutiérrez Lueje estudió’l grau de Llingua Española y Lliteratura con minor en Llingua Asturiana y exerz como profesora de Llingua. Nel ámbitu de la llingua asturiana, participó na revista lliteraria Formientu y ganó dellos premios en cértámenes lliterarios como’l concursu Entaína a escribir de microrrelatos improvisaos o Qué guapu ye querese, entamáu pola Oficina de la Llingua de Xixón. Bien venceyada al deporte de monte, tamién fixo collaboraciones audiovisuales n’asturianu de temes deportives nel programa Sentir Asturies emitíu en RTPA y na plataforma online Play Presta, onde aborda temes deportivos.
