«Promover l’alfabetización na era dixital».Esti día foi establecíu nel añu 1965 pola Organización de les Naciones Xuníes para la Educación, la Ciencia y la Cultura (UNESCO) coles mires d’espublizar y resaltar la importancia de l’alfabetización na sociedá y nel individuu.
De magar, el conceutu d’alfabetización foi evolucionando a lo llargo del tiempu y, anguaño, dichu conceutu ye consideráu como una habilidá para aprender.
L’alfabetización ye la base para adquirir conocencies, habilidaes, valores, actitúes y comportamientos más amplios que fomenten una cultura de paz duradera basada nel respetu a la igualdá y la non discriminación, l’estáu de derechu, la solidaridá, la xusticia, la diversidá y la tolerancia, y que construyan relaciones harmonioses con unu mesmu, con otres persones y col planeta.
Anguaño, el Día Internacional de l’Alfabetización (DIA) va celebrase so la tema: «Promover l’alfabetización na era dixital».
La dixitalización ta tresformando la forma en qu’aprendemos, vivimos, trabayamos y socializamos, con efectos tantu positivos como negativos, dependiendo de cómo rellacionamos con ella. Magar les ferramientes dixitales pueden ampliar les oportunidaes d’aprendizaxe para los grupos marxinaos esti cambéu dixital tamién trai’l riesgu d’una doble marxinación: esclusión tantu del aprendizaxe tradicional como de los beneficios de la era dixital. La dixitalización tamién plantega otres esmoliciones, como cuestiones de privacidá, vixilancia dixital, sesgos reforzaos, ética, consumu pasivu y efectos sobro’l mediu ambiente.
L’alfabetización ye clave por que estos tresformamientos sían inclusives, pertinentes y significatives. Más allá de lleer y escribir en papel, l’alfabetización na era dixital dexa a les persones aportar, entender, evaluar, crear, comunicar y participar en conteníos dixitales de forma segura y fayadiza. Tamién ye fundamental pa fomentar el pensamientu críticu, identificar información confiable y desendolcase en redolaes informatives complexos.
