- El Principáu multiplica los espectáculos de la Xira Didáctica 25/26, con 76 funciones gratuites en 30 conceyos pal alumnáu d’asturianu y eonaviegu. Programa Xira en asturiano / Programa Xira en eonaviego
- El plazu d’inscripción pa los centros educativos va tar abiertu hasta’l 30 de setiembre.
- La programación incluye propuestes escéniques, musicales, audiovisuales, lliteraries y de tradición oral, diseñaes pa cada etapa educativa.
Les conseyeres de Cultura, Política Llingüística y Deporte y d’Educación, Vanessa Gutiérrez y Eva Ledo, presentaron esta mañana la programación de la Xira Didáctica pal cursu 2025/2026, que sestuplica la ufierta de la edición anterior. Esta iniciativa va ufiertar un total de 76 funciones gratuites n’asturianu y eonaviegu, repartíes en 30 espectáculos y actividaes que van percorrer 30 conceyos asturianos.
El programa ta dirixíu al alumnáu de Primaria, Secundaria y Bachilleratu, y combina conteníos culturales y educativos cola mira de fomentar l’usu y conocencia de les llingües propies d’Asturies nel ámbitu escolar.
El Principáu ufierta al alumnáu de Llingua asturiana y lliteratura y d’eonaviegu una escoyeta de propuestes creaes pola industria cultural asturiana que combinen un conteníu educativu singular cola calidá artística y tán adaptaes a cada públicu oxetivu.
A les artes escéniques y propuestes musicales súmense nesta convocatoria actividaes vinculaes al cine y al audiovisual, a la lliteratura y narración oral y a la cultura tradicional, ampliando’l númberu de disciplines del programa de la Xira, qu’empezó nel trimestre últimu del cursu pasáu cola programación de cinco espectáculos de compañíes y artistes asturianos.
La Xira va empezar con Nueche d’ánimes/La pantasma’l 8 d’ochobre en Parres y va rematar el 18 de xunu que vien con La neña de les trences al revés en Cabranes.
Toles actividaes d’esti programa, que financia y xestiona la Conseyería de Cultura, Política Llingüística y Deporte al traviés de la Sociedá Pública de Xestión y Promoción Turística y Cultural del Principáu d’Asturies, son gratuites y les places son limitaes. Los centros educativos namás van tener qu’asumir los costos que puedan ocasionar los desplazamientos, nel casu de que seyan menester.
La programación va desenvolvese n’espacios culturales de los conceyos participantes, con feches y horarios yá establecíos, lo que dexa a los centros educativos planificar la so participación con calter antemanáu. La reserva faise de forma telemática y priorízase al alumnáu matriculao en llingua asturiana o eonaviegu.
- Pa participar nesti proyectu hai qu’acutar plaza al traviés de https://entradas.turismoasturias.es/es/xira-didactica.
- El plazu d’inscripción empieza’l 17 de setiembre a les 09:00 hores y acaba’l 30 de setiembre a les 23:59 hores.
El catálogu d’esta edición incluye una variedá amplia de propuestes escéniques, musicales, audiovisuales y lliteraries, como “Amanda y les castañes máxiques”, “Azul y la revolución de los colores”, “El xardín d’Olivia”, “Gasolina con capullos”, “Pop Piquiñín”, “Contos pra ser quen queras ser”, “Bruxa. Cuntacuentos y taller de conxuros máxicos”, “El Conciertín, conciertu didácticu de música tradicional”, “Verdina. El día qu’una faba cósmica aterrizó n’Asturies”, “Dido y Eneas” o “caLORCAlor”, ente otres. Cada actividá ta diseñada pa un ciclu educativu específicu, dende Infantil hasta Bachilleratu, y combina valores pedagóxicos con una calidá artística alta.
La Xira Didáctica, un programa pioneru. La Xira Didáctica ye un programa pioneru impulsáu poles conseyeríes de Cultura, Política Llingüística y Deporte y d’Educación, que quier llevar la cultura n’asturianu y eonaviegu a les aules de toa Asturies. Al traviés d’esta iniciativa, promuévese’l contactu directu del alumnáu col so patrimoniu llingüísticu y cultural, reforciando la normalización y promoción de les llingües propies nel ámbitu educativu.
Na edición del trimestre últimu del cursu pasáu participaron un total de 27 escueles asturianes, con una asistencia de 1.039 estudiantes y 107 docentes acompañantes.
Esta Xira Didáctica enmárcase nel conxuntu de midíes del Principáu pa fomentar la enseñanza y l’usu del asturianu y l’eonaviegu nes aules. Ente elles, destaquen la so inclusión dende esti cursu nel segundu ciclu d’Infantil y nes Escueles Oficiales d’Idiomes o la so presencia nos premios estraordinarios.
