Esperamos una xornada bien nubosa, especialmente na metá oriental. Tamién se preven nubes escontra l’oeste pero van ser menos compactes. Esta nubosidá va dexar precipitaciones débiles que van ser más frecuentes escontra l’esti pero nun se refuguenpuntualmente dellos orbayos escontra l’occidente, a pesar de ser menos probables. Les temperatures van sufrir un descensu importante al respective de les rexistraes el domingu. Van baxar unos 4 ºC nel occidente y hasta 6 o 7 ºC nel restu del Principáu. Poro, va ser raru que los termómetros lleguen a superar los 20 ºC na mayoría de poblaciones asturianes mientres el día. Amás, les temperatures mínimes tamién van baxar unos 4 o 5 ºC en toa Asturies. Los vientos van ser fluexos predominando de noroeste-norte tol tiempu.
El martes vamos tener un mayor protagonismu del sol cuidao que los cielos van tar pocu nublos. Gracies tamién a la presencia del sol, y a unos vientos que van tender a soplar d’oeste-suroeste, les temperatures van recuperase y van xubir hasta 4 o 5 ºC, salvu nel suroccidente onde se van caltener y na mariña onde van xubir de forma más llixera.
