Vamos encarar un domingu soleyeru mientres tol día (sacantes delles nubes namá a primer hores de la mañana) en tol Principáu d’Asturies. Los vientos van ser fluexos y variables, predominando d’oeste na mariña y de sur-suroeste nel interior. Les temperatures máximes van xubir hasta 4 o 5 ºC respectu al sábadu en casi tola rexón. Na mariña y en dellos puntos del oeste l’ascensu va ser daqué más llixeru (hasta 2 o 3 ºC más). Con éses van anotase los 26/27 ºC en casi tol interior, salvu nel interior occidental onde podríen rondar los 29/30 ºC. Nes localidaes costeres, polo xeneral, va llegar a los 24 o 25 ºC.
El llunes va crucianos un frente fríu pocu activu que va dexar abondosu nubosidad n’Asturies que va dir entrando dende’l lladral oeste a lo llargo de la mañana. Estes nubes tamién van dexar precipitaciones de calter débil que se van dir xeneralizando por tola Comunidá Autónoma. Amás, les temperatures van baxar de forma notable cuidao que, al respective de les que se rexistren el domingu, van baxar hasta 6/8 ºC menos. Poro, va haber poblaciones asturianes que-yos cueste algamar los 20 ºC. Asina tou, el tiempu va dir ameyorando col intre de la selmana y volveremos tener díes soleyeros y con temperatures percima de los 25 ºC.
