Tres dellos díes calorosos que tuvimos esta selmana, el sábadu reparemos como les condiciones meteorolóxiques camudaron debíu al pasu d’un frente fríu que consiguió aumentar la nubosidá y baxar les temperatures mientres el día. El domingu vamos encarar una xornada na que nuevamente van baxar entá más les temperatures. Prevense intervalos nublos con bastios a lo llargo del día que van ser más frecuentes mientres la segunda parte de la xornada y pudiendo venir acompañaos de nube. Los vientos van ser fluexos de noroeste-oeste polo xeneral con dalguna racha daqué más moderada sía que non escontra’l sector occidental.
El llunes 22 de setiembre va dar entamu oficialmente la seronda astronómica concretamente a les 20:19 hores de la tarde. Y prueba d’ello va ser el tiempu tan serondiegu que se va esperar con cielos bien nublos, precipitaciones débiles a moderaes mientres tola xornada que van ser persistentes na mariña y un nuevu descensu de les temperatures. Va haber posibilidá de ver les primeres nieves n’altos cumes cuidao que s’espera que la cota ronde los 1900/2000 metros d’altor. Tiempu bastante frescu tamién para’l martes anque yá con estabilidá cola que vamos siguir nos siguientes díes.
