11 y 12 de setiembre Creadores contemporaneos como Rodrigo Cuevas, Xaime Martínez, Laura Casielles, Alba González Sanz o Paquita Suárez Cuaya participen nun alcuentru para amosar el patrimoniu cultural y llingüístico de la rexón na ciudá estadounidense. El Comercio / RTPA /
Dalgunos de los ceadores asturianos que van participar nel eventu
‘Asturies: territoriu de conocencia y de cultures’
El programa inxerta tres xeres culturales qu’amuesen la riqueza académica, artística y lliteraria asturiana y nes que s’afondará n’aspectos como la lliteratura, la música, el folclor o la industria musical y el so papel nel mediu rural.
- La Universidá d’Uviéu lleva la cultura asturiana contemporánea a Nueva York.
La iniciativa cunta col patrociniu de la Conseyería de Cultura, Política Llingüística y Deporte del Principáu d’Asturies, según del Institutu Cervantes y del Consuláu Xeneral d’España en Nueva York. La delegada del Rector para’l Real Colexu Complutense n’Harvard y América del Norte, Cristina Valdés, foi la impulsora d’esti proyectu col que la Universidá d’Uviéu busca «reafitar el so compromisu col territoriu al empar que fomenta la so proyección global».
«Llevar la cultura asturiana a un espaciu como’l de la Universidá de Nueva York significa abrir nueves víes de collaboración académica y cultural que beneficien tantu a Asturies como a la comunidá hispanofalante d’Estaos Xuníos», añedió.
El programa inclúi trés actividaes culturales que reflexen la riqueza académica, artística y lliteraria asturiana y va desenvolvese na see d’Espaciu de Cultures de la Universidá de Nueva York, en Washington Square. Mientres la primer xornada va encetase la lliteratura y el papel de la Universidá na rexón al traviés de dos propuestes.
Va abrir el ciclu una conferencia sobro La Universidá d’Uviéu nel so territoriu que va impartir la mesma Cristina Valdés, profesora de Filoloxía Inglesa, p’amosar la vocación internacional y el compromisu col territoriu de la institución académica asturiana.
Dempués, va tener llugar un conversatorio ente los escritores asturianes Laura Casielles, Alba González Sanz y Paquita Suárez Cuaya, tituláu Lliteratura n’Asturies, escribir ente dos veres. Nél van encetar los grandes desafíos de la lliteratura actual y les singularidaes de la producida por muyeres, dende dambes veres.
Asturianos residentes en Nueva York
La segunda xornada va tar dedicada a la música y al folclor. Pa ello, Xaime Martínez y Rodrigo Cuevas, que va participar por videoconferencia, van cavilgar sobro la innovación y la creatividá de los ceadores asturianos contemporaneos al traviés de la esploración de nueves formes d’espresión ensin perder el venceyu colos sos raigaños. Al pie de la musicóloga Raquel López Fernández, van dialogar sobro la vocación internacional de la cultura asturiana y el papel de la industria cultural nel mediu rural. L’alcuentru va ser presentáu por Luke Bowe, historiador venceyáu a la Universidá de Nueva York que realizó una estancia na Universidá d’Uviéu.
Ente lo más destacable de la iniciativa, cabo señalar la implicación y collaboración que numberosos asturianos y asturianes residentes en Nueva York amosaron cola organización del eventu. Con esta iniciativa, la Universidá d’Uviéu consolida’l so papel como ponte ente la tradición asturiana y los escenarios internacionales, reforzando la visibilidá de la llingua, la lliteratura y la música de la rexón nun marcu global.
