RTPA /
Aemet decreta avisos por lluvia y tormentes nel oriente y Los Picos d’Europa. L’Axencia Estatal de Meteoroloxía pide precaución por fuertes tormentes que podríen producise nes hores vinientes na metá oriental d’Asturies.
Y ye qu’en daqué menos de 48 hores taremos oficialmente nuna seronda que yá afitamos nesti sábadu con un cambéu mui bruscu na temperatura. En dalgunos puntos cayeron d’ayeri a güei más de 10 graos. Un exemplu, en La Pola (Somiedu) güei a les 16:00 había daqué más de 20 graos, cuando ayeri a la mesma hora los termómetros algamaron los 33 graos y mediu. En Caborana la máxima superó los 36 graos, güei nun llegó a los 23.
La temperatura máxima n’Asturies foi en Cabrales, con cuasi 27 graos. Ayeri esa máxima foi n’Ayer, pero con 36 graos y mediu, cuasi 10 graos de diferencia.
Dempués d’un vienres chornosu, esti sábadu vivímoslu mui inestable, viéronse más chaquetes y yá fai falta tener el paragües a mano.
L’Aemet tien activos dende primer hora de la tarde nel centru, oriente y Los Picos d’Europa l’avisu mariellu por tormentes y lluvia. Y ye qu’un frente fríu y lluviosu entró per Galicia y muévese pal centru de la península dexando inestabilidá. Tamién se notará na costa, sobre manera mañana domingu y llunes, con un avisu mariellu por foles fuertes.
