Los datos d’agostu confirmen la bona evolución del mercáu llaboral n’Asturies, que raspia les 400.000 afiliaciones a la Seguridá Social. La directora xeneral d’Empléu, destaca la meyora “nun mes nel que tradicionalmente rexístrase un aumentu del paru debío a la fin de la temporada braniza y l’amenorgamientu de contrataciones nel sector servicios”. Actualidá Asturies
El Principáu encadena 53 meses de meyores consecutives y amenorga el númberu de persones en paru a 48.298, la cantidá más baxa dende 2008
Asturies consolidó n’agostu’l bonu enclín del so mercáu llaboral, liderando la creación d’empléu a nivel nacional y afitando la baxada del paru. El Principáu algamó los 399.453 afiliaos a la Seguridá Social, lo que supon una medría de 1.348 persones ocupaes respectu al mes anterior y raspiar los 400.000 ocupaos. Amás, el númberu de persones desemplegaes inscrites nes oficines del Serviciu Públicu d’Empléu baxó en 131 persones, lo que representa una cayida interañal de 4.087 persones. En total, hai 48.298 paraos n’Asturies, la cifra más baxa dende agostu de 2008.
Con estos datos, Asturies encadena yá 53 meses consecutivos de descensu interañal del paru y otros tantos na xubida de l’afiliación a la Seguridá Social, lo que reflexa unu enclín sólidu y sostenida na meyora del mercáu llaboral. Ello ye que el Principáu tien güei 17.192 persones menos en paru y 25.342 más con trabayu que n’agostu de 2019.
La directora xeneral d’Empléu, Judit Flórez, valoró bien positivamente estes resultancies, sorrayando que “el comportamientu del mercáu llaboral asturianu n’agostu foi escepcional, especialmente nun mes nel que tradicionalmente rexístrase un aumentu del paru debío a la fin de la temporada braniza y l’amenorgamientu de contrataciones nel sector servicios”.
Asturies non solo ruempe col enclín nacional, sinón que lidera la crecedera de l’afiliación a la Seguridá Social en tol país. Ente que nel conxuntu d’España l’afiliación amenorgose en 199.300 persones (-0,91%), Asturies rexistró una medría del 0,34%, siguida per Cantabria (0,10%) y Canaries (0,08%). En cuanto al desempléu, la comunidá ye la cuarta rexón con mayor descensu.
Judit Flórez destacó que “estes resultancies evidencian les fortaleces del mercáu llaboral asturianu y el compromisu del Gobiernu del Principáu, xuntu colos axentes económicos, nel desenvolvimientu de polítiques eficaces de fomentu y activación del empléu”.
