LNE /
Lucas y Elián converten en mundial la danza de Llugones: «Baillar fainos inmensamente felices». Los mozos participaron el pasáu xunetu nel Global Dancie Open celebráu n’Inglaterra y ensayen más de dolce hores a la selmana.
Llámense Lucas González y Elián Iglesias, tienen quince y dolce años, respectivamente, y lleven la metá de la so vida baillando. Ensayar más de dolce hores a la selmana tien el so pagu y dambos mozos, alumnos de l’academia CandelArte de Llugones (Siero), consiguieron clasificase en Mérida para participar nel Mundial Global Dancie Open celebráu en Birmingham (Inglaterra) a mediaos del pasáu mes de xunetu.
Nacedanza, Orbe, Cantábricu Dancie Festival, DelArt Festival, Vive’l to suañu o Soulshine son tan solo dalgunos de los certames nos qu’estos talentosos baillarinos participaron mientres la so prometedora trayectoria.
Lucas González va empezar el próximu añu a estudiar Bachilleratu Artísticu, «yá que me gustaría dedicame a ello profesionalmente», ente que a Elián Iglesias gustaría-y estudiar una carrera, pero tamién aportar a profesor de baille. Y ye que, a pesar de les hores d’ensayu qu’empleguen a la selmana, aseguren que «pel momento, nun nos resulta difícil compaxinalo colos estudios».
Dambos mozos aseguren que nos gusta baillar, porque ye la nuesa manera d’espresanos y resúltanos muncho más fácil, n’ocasiones, que faelo con palabres». «Ye una actividá que nos fai inmensamente felices y, amás, pasamoslo perbién», sorrayen los mozos.
Elián Iglesias garrasti a clases de baille contemporaneu, ballet y fit kid. Amás, tamién fai ximnasia rítmica, una disciplina na que ye prácticamente autodidacta. «Llamóme enforma l’atención cómo s’usaben los aparatos y les ximnastes Dina y Arina Averina, a les qu’empecé a siguir en redes», recuerda. «Empezó a practicar viendo distintes exhibiciones y campeonatos en Youtube, hasta que di cuenta de que, realmente, lo taba faciendo ensin nengún tipu de técnica y decidimos que tamién recibiera formación», esplica la so madre, Dolores Iglesias.
Nesti sentíu, la proxenitora llamenta que «el mio fíu nun pueda aportar a más campeonatos más allá de los nacionales, porque entá nun esisten abondos homes que practiquen la ximnasia rítmica». Con tou, caltienen la esperanza de que «esa situación camude dalgún día».
La madre de Lucas González, Carolina García, escribió un cuentu infantil basáu na hestoria del so fíu. «Lucas quier baillar» cuenta como dempués de probar dellos deportes, como’l fútbol o’l baloncestu, el día más feliz foi’l día que los sos padres dixéron-y qu’apuntárenme a una academia de baille». El cuentu narra’l suañu de munchos pequeños. «Oxalá esta hestoria ayude a tolos neños y neñes que se somorguien nella a siguir lluchando polos sos suaños», apunta la madre. «Inda son bien pocos los pequeños que s’animen a faelo debíu, sobremanera, a la presión social», llamenta.
Alba Hernández-Mirueña, que ye la propietaria de CandelArte y profesora de Lucas González y Elián Iglesias, xuntu con Xana Collada y Andrea Piña, esplica que «dacuando, esos prexuicios atopense nel so propiu llar, non solo na redolada. Lo primero qu’hai que faer ye mentalizar a la sociedá de que la danza ye un deporte, un arte y una forma d’espresión y que los homes son perfectamente válidos para practicalo».
Elián Iglesias reconoz que «cuando yera más pequenu sí qu’hubo compañeros que se ríen de mi porque quería baillar». Sicasí, «anque de primeres afectóme un pocu, decidí escoyer ser feliz primero qu’esmoleceme pola opinión de los demás».
Tanto Lucas como Elián animen a tolos neños, independientemente de si son chicos o chiques, a ser valientes y buscar la so felicidá escorriendo los sos suaños. «Siempres va haber daquién en quien sofitase nel camín», sorrayen unos baillarinos que yá fixeron mundial la danza de Siero.
