Medayes d’Asturies y de los títulos de Fíu Predilectu y Fíu Adoptivu

• Radiotelevisión del Principado de Asturias
• / Actualidá Asturies /Asturies apurre les sos medayes nel día de la comunidá.

Aplausu, reconocencia y gratiúd pola so trayectoria volcada en sirvir a los demás. Ye lo que recibieron esta tarde los galardonaos coles Medayes d’Asturies. Dos nun tuvieron presentes nel escenariu del Auditoriu d’Uviéu, Antonio Trevín y Consuelo Busto de Bodegues Mayador, al morrer. Fueron los sos familiares, emocionaos, los encargaos de recibir el galardón. Adriana Lastra fixo un llamamientu a la concordia y la unidá. Actualidá Asturies Esta tarde, a les 17:30, en #TPA

Los distinguíos coles Medayes son el expresidente del Principáu, Antonio Trevín, fináu’l pasáu mes de xunetu; la que fuera presidenta de la empresa Manuel Bustu Amandi (Bodegues Mayador), Consuelo Busto Alonso, a títulu póstumu; el profesor de Llingua nel Institutu Elisa y Luis Villamil d’A Veiga y impulsor del Foru Comunicación y Escuela, Luis Felipe Fernández García; la presidenta d’honor de la Federación d’Asociaciones de Mayores del Principáu (Fampa), Dolores San Martín San José; y el profesor d’Hestoria Contemporanea de la Universidá d’Uviéu, que dirixe la Cátedra de la Sidra d’Asturies de la institución académica, Luis Benito García Álvarez, son los galardonaos.

Coles mesmes, el Gobiernu asturianu apurre los títulos de fíos predilectos y adoptivos. Nel primer bloque atópase la fundadora d’Alpe Acondroplasia, Carmen Alonso, la vicepresidenta del Comité de Representantes de Persones con Discapacidá (CERMI), Mónica Oviedo, y el lletráu mayor de la Xunta Xeneral hasta l’añu pasáu, Alberto Pládanu.

Na categoría de fíos adoptivos figura’l ceador de la imaxe “Asturies Paraísu Natural”, Arcadi Moradell, y el exrector de la Universidá d’Uviéu y ciruxanu maxilofacial, Juan Sebastián López-Arranz.

Luis Felipe Fernández del Foru de Comunicación, Dolores San Martín de la Federación de Mayores y Luis Benito García, l’impulsor de la reconocencia de la Unesco a la sidra, completen la nómina de les medayes d’Asturies d’anguaño.

Nel so discursu los galardonaos coles Medayes d’Asturies aprovecharon p’agradecer, pero tamién pa reivindicar. Eva Paredes, fía de Dolores San Martín, reclamó que non solo se curie a les persones mayores, sinón que tamién s’escuchen y seyan parte de la vida social.

Pela so parte, Luis Benito García y Luis Felipe Fernández defendieron el valir de les humanidaes y reivindicaron la enseñanza pública como la fundamental nel mundu rural.

La viuda del ex-presidente del Principáu, Antonio Trevín, y el fíu de la pionera nel sector sidreru Consuelo Busto, muerta en 2023, reivindicaron el so legáu al recoyer los galardones.

Y nesi actu, el presidente del Principáu nel so discursu faló de consensu, del alcuerdu necesariu n’asuntos como la educación, el financiamientu autonómicu o’l cuidáu del territoriu.

Arcadi Moradell, diseñador del logo d’Asturies Paraísu Natural, distinguíu como Fíu Adoptivu d’Asturies, espresó’l so contentu por contribuyir a la crecedera de la tierra asturiana.

Arcadi y Arranz, Fíos Adoptivos, espresaron el so contentu por contribuyir a Asturies.

Na ceremonia tamién se reconoció a tres fíos predilectos. Toos agradecieron el galardón y una d’elles, la presidente de Cocemfe, Mónica Oviedo, reivindicó una Asturies accesible.

El tamién Fíu Adoptivu, el ciruxanu y ex-rector de la Universidá d’Uviéu, Juan Sebastián López-Arranz, punxo énfasis nel so enfotu n’ameyorar la sanidá y la universidá asturianes.