LNE /
Respuenden los bisnietos arxentinos de la emigración asturiana.
Cuatro alumnos adolescentes del colexu Cuadonga, venceyáu al Centru Asturianu de Santa Fe, cavilguen sobro los sos raigaños ya identidá asturiana por cuenta de la celebración del 8 de setiembre. El colexu Cuadonga ye un casu únicu de defensa de l’asturianía n’América: medio millar d’escolares estudien, amás de les asignatures preceptives del curriculum arxentín, otres rellacionaes coles tradiciones y la cultura d’Asturies.
El colexu laicu Nuesa Señora de Cuadonga de Santa Fe, Arxentina, ye un casu escepcional de defensa de l’asturianía. Nesti centru que nació en 1992 y que pertenez al Centru Asturianu de Santa Fe tien unos 500 alumnos y muncha llista d’espera. Amás de les asignatures habituales toos reciben formación sobro la cultura, la hestoria y les tradiciones asturianes.
LA NUEVA ESPAÑA ufiertó a la dirección d’esti colexu asturianu al otru llau del mar que cuatro alumnos respondieren por escritu a una entruga: «¿Qué ye Asturies pa tí?». Esto ye lo que respondieron.
«Los llugares que quies», por Emilia Bono
Los llugares importantes na nuesa vida non siempres son aquellos onde nacimos o nel que vivimos, sinón que son esos qu’aprendemos a querer a la distancia, inclusive ensin poner un pie nellos.
Asturies, pa munchos, ye solo un llugar más nel mundu, un llugar más d’España, un llugar ensin importancia mayor y totalmente alloñada de la identidá de cada unu. Pa otros, pa mi, y toi segura de que, pa cada alumnu que tuvo la oportunidá d’estudiar nel Colexu, nunca se trató solo d’eso. Siempres significó bien de más.
Tengo la suerte d’asistir a la mesma escuela dende xardín d’infantes. Crecí ente les sos parés, cola icónica bandera azul con una cruz dorada y con cuadros de los sos paisaxes, mientres escuchaba relatos d’esperiencies nel llugar, conociendo la so xeografía, la so hestoria y la so mitoloxía. Siguí creciendo y toos eses conocencies salieron de les cuatro parés de l’aula y tresformáronse nun sentimientu. Esi sentimientu d’arguyu y pertenencia al escuchar falar del llugar, al entonar l’himnu, al izar la bandera o celebrar a la nuesa Virxe de Cuadonga.
Nunca la sentí distante porque crecí sol abellu de les sos costumes y tradiciones que me tresformaron na persona que soi güei. Tampoco foi distintu pa la mio familia, qu’acompañaron y inculcaron esi amor per aquelles tierres maraviyoses. Y ello ye asina porque Asturies ye comunidá, ye hestoria, llucha, pasáu y presente, gaites y panderetes sonando peruquier.
Porque ye almirar esi momentu nos actos escolares onde tolos presentes, ensin distinción d’edá, entonen l’himnu como si fuera propiu –qu’en cierta forma ser, porque’l sentimientu de pertenencia ye imposible de negar-. Onde puedo atalantar que non solo los alumnos conocen el Cantar Patriu, sinón que tola familia fízolo.
Y ende ta la maxa; ye máxicu pensar na tresmisión del sentimientu de persona en persona, de profesor a alumnu, de fíu a padre y de la comunidá a tou aquel que s’avera. Porque Asturies non solo ta representada nun grupu de persones que vinieron a estes tierres a cultivales y trescalales de les sos costumes, cantares y colores, sinón que ye xuna familia. Siendo la representación de los asturianos y la so cultura a diez mil kilómetros, llogrando faer sentir qu’Asturies ta acá, na Escuela, nos nuesos corazones y no que somos. Xuniéndonos por alcordances, valores, sentimientos ya idees compartíes.
Cuando piensu n’Asturies non solo voi al mapa español, a una imaxe de los sos paisaxes o a la mio conocencia de lo tradicional. Sinón que voi al Colexu, porque Asturies pa mi ye eso, ye’l Colexu. Y anque pueda sonar simple, nun lo ye, porque la escuela significa gran parte de mi, de quien soi, de quien busco y quiero ser.
Güei entiendo que nun ye namá aprender sobro hestoria, cultura y tolo que comenten y quiérennos inculcar los docentes. Ye crear esa identidá que nos xune, márcanos como persones y vanos a acompañar tola vida. Porque d’eso trátase: de ser llibres pa escoyer qué queremos llevar con nós; y yo escueyo llevar a Asturies conmigo, porque faelo, ye llevar a muncho más qu’una cultura, nun ye solu parte del mapa, ye parte de mi, y siempres lo voi a estimar.
Emilia Bono ye alumna de 4º añu del Colexu Ntra. Sra. de Cuadonga, Santa Fe, Arxentina.
«L’heriedu de Rosa», por Victoria Romero
Faigo esa entruga -«¿Qué ye Asturies pa mi?»– y darréu recuerdo’l primer día que trié la escuela Cuadonga, como si fuera ayeri. Tenía apenes 3 años y taba a puntu d’empezar la mio aventura nel xardín d’infantes. La escuela yera un llugar máxicu, un ambiente alcontradizo que me fixo sentir cómoda dende’l primer día.
A midida que fui creciendo, afayé que la escuela Cuadonga non yá ye un llugar formosu, sinón que tamién ufierta un aprendizaxe escelente y bien arriquecedor. Los profesores son apasionaos y dedicaos, y siempres s’esforcien por faer que les clases sían interesantes y risonderes. Dende pequeños, enseñáronnos a pensar críticamente y a resolver problemes de manera creativa.
Agora, que toi en cuartu añu de la Secundaria, puedo mirar escontra tras y ver tou lo que llogré gracies a esta maraviyosa escuela. Siéntome arguyosa de poder ser parte d’esta comunidá educativa, la escuela foi un llugar onde pudi crecer y maurecer, non solo como estudiante, sinón tamién como persona.
Pero la escuela Cuadonga tien un significáu especial pa mi, más allá de la educación que recibí.
La mio bisagüela Rosa, viaxó dende Asturies a l’Arxentina en busca d’una nueva vida. Ella sentía una gran señardá pela so tierra natal, la comida y les tradiciones que dexara tras.
Ella foi xuna de les primeres en fomentar el Centru Asturianu en Santa Fe, y la so pasión pola cultura y les tradiciones de la so tierra natal yera contaxosa. Esforciose por caltener vives les costumes y les tradiciones d’Asturies. Entamaba xuntes y eventos nel Centru Asturianu, onde se cocinaba y comíase fabada, y baillábense los característicos bailles asturianos.
Cola mio familia siguimos les tradiciones que la mio bisagüela empecipió va tanto tiempu. Vamos comer fabada nel Centru Asturianu, baillamos los bailles tradicionales y celebramos les fiestes asturianes. Siempres falamos y recordamos hestories sobro la hestoria y la cultura d’Asturies.
Pa mi, Asturies ye más que namá xuna provincia d’España. Ye xuna cuestión de raigaños familiares y antepasaos. Ye’l llugar onde nació la mio bisagüela, onde creció y onde se formó como persona. Ye’l llugar que me dio xuna identidá y xuna conexón bien especial col mio heriedu cultural.
Siéntome arguyosa de ser descendiente d’asturianos y de poder siguir celebrando les tradiciones y les fiestes de la mio tierra ancestral. Asturies ye un llugar que me fai sentir conectada al mio pasáu y a la mio familia, y ye un llugar que siempres voi llevar conmigo.
La escuela Cuadonga enseñóme a valorar la importancia de la familia y de esi heriedu cultural, al empar que me dio xuna sensación de pertenencia a una comunidá más grande.
Victoria Romero ye alumna de cuatro añu de la Escuela Secundaria Ntra. Sra. de Cuadonga, Santa Fe, Arxentina.
«Mui cerca nel corazón», por Alejo Bono
Sol mio puntu de vista, uno siempres quier crecer nun llugar llenu de ciñu, cercanu, onde te sentís cómodu, tranquil. Eso pa mi significa esta escuela: la mio vida diaria, los mios amigos, anécdotes, alcordances y demasiaes aventures como pa escaecer.
Esta escuela volvióse un llugar cercanu pa mi. Nun Imaxino la mio vida n’otru colexu, porque son munchos años acá y siento que ye parte de lo que soi. Nun camudaría nada por dir me, porque dende’l principiu fixéronme sentir cómodu, respetáu ya incluyíu. Ye un espaciu onde non solo aprendí diverses materies, sinón tamién lo que significa compartir, pertenecer y crecer con otros.
Asturies fixo parte de la mio rutina: nos actos, nos cantares y bailles típicos, nes hestories que cuntaben los profesores. Ye como un pedacin d’España que se foi colando na mio vida diaria, hasta volvese daqué propiu.
Tuvi la suerte de visitar Asturies, anque fuera demasiao mozu. Ye una alcordanza que guardo con ciñu y que siempres voi tener. Seique nun lo viví con plena conciencia nesi momentu, pero güei emocióname saber que tuvi dalguna vegada nel llugar del que tanto me falaron.
Crecí escuchando sobro esa tierra de montes verdes, gaites y sidra. Amás, dende chiquitin vienen enseñándonos sobro la cultura asturiana, sobro la so xeografía, les sos costumes, los cultivos, la música y tantes coses más. Ye daqué bien atiesto poder recordalo agora, porque doi cuenta de que toes eses enseñances nun fueron solu datos, sinón parte d’una tradición que me foi formando y que me conectó colos mios raigaños d’una manera especial. Recuerdo escuchar con muncha atención aquella hestoria sobro’l Trasgu, el Nuberu, y tantos otros relatos que nos cuntaben en clases d’asturianía. Nun yeren namá relatos, yeren pedacinos d’esa cultura maraviyosa que nos llegaba a nós.
Otra cosa más qu’alcordanza y siento que me conecta con esta tierra ye’l fechu de qu’aprendimos a escribir n’asturianu, anque nun foi enforma, y foi va dellos años. Siento que de dalguna manera soi «un pocu asturianu».
A lo último, quiero aportunar no cómodo, feliz, protexíu qu’ún se siente dientro de la institución, tantos años acá fáenme pensar que nun tengo solu compañeros, sinón xuna familia. Siento qu’hai que valorar eso, yá que son persones qu’uno ve tolos díes mientres la so infancia y adolescencia. Y siéntome arguyosu de poder dicir eso d’esti colexu y los mios compañeros. Y eso tamién ye Asturies: llar, familia, comunidá y sentíu de pertenencia escontra daqué que, anque llueñe, siéntese mui cerca del corazón.
Alejo Bono, alumnu de 4º añu del Colexu Ntra. Sra. de Cuadonga, Santa Fe, Arxentina.
«Una familia al otru llau», por Augusto Lazzarini
Pregúntenme qué ye Asturies pa mi y tengo que pensar cómo espresalo en palabres.
Asturies ye l’ecu d’una alcordanza que nun ye mio, son les palabres d’un bisagüelu que remembra con señardá los tiempos pasaos nel so tierrina. Ye una madre que despidió a los sos fíos xuntu al mar y ellí sigue esperándolos, anque’l so interior esgañase porque sabe que nun volverá ver los nunca más.
Asturies ye la busca de los raigaños y de una familia desconocida que se siente abargana, anque tea a miles de kilómetros. Ye’l llugar onde yo podría nacer, anque eso nunca lo sabré. Ye un horru qu’entá se caltien naquel pueblin de San Cristóbal y tamién ye una semeya en blancu y negru d’una familia de llabradores onde intento aldovinar parentescos.
Ye la música d’una gaita que resona de llueñe y qu’aprendí a escuchar mientres el tiempu que pasé na escuela, esta escuela que caltien aquelles tradiciones *ancestrales, éses qu’aprendí dende neñu, son los güevos pintos, ye la danza prima y los deseos escritos nun papel pa quemar na fogata de San Xuan, qu’equí alluma la nueche más llarga y que se va dir encurtiando hasta llegar el branu.
Son les lleendes y los seres fantásticos d’un *folclore distintu al d’estes tierres americanes, ye’l Trasgu que-y escondía les coses a la mio güelita, el Nuberu qu’enfresca les tardes de calor y ye la Xana que se peña nel llagu.
Ye’l relatu de los emigrantes, cada unu cola so propia hestoria d’esraizadura, de dolor y d’esperanza en forxar un futuru meyor. Ye la promesa por cumplir de traer a tola familia hasta estes tierres, o de tornar triunfante como indianu dempués de faer « l’América».
Asturies ye Cuadonga, ye la Santina que salva a los cristianos de l’amenaza mora, ye l’entamu de reconquistar d’España de la mano de Pelayo, a quien tantes vegaes interpretamos nos nuesos actos escolares. Ye la Patria quería que cantamos con arguyu y pasión, anque nunca llegáramos a vela.
Ye gaita y baille, ye sidra y cantar, Asturies ye allegría y pasión. Ye misa’l 8 de setiembre y ye pasacai y fabada, ye cachopu y frixuelos, ye arroz con lleche con arume de canela y postre de mazanes.
Asturies ye tou eso qu’heredé del bisagüelu asturianu, el que crució’l mar con destín inciertu, escapando de penuries y buscando el porvenir a la mesma edá en que yo terminé’l colexu, va un tiempu yá.
Asturies pa mi ye la metá de la mio sangre, ye la mio güela y ye el so padre, ye’l pruyimientu de cruciar el mar y abrazar a aquella madre que ta esperando a que la so Celestino torne a cunta-y que se casó, que tuvo xuna fía, nietos y bisnietos, qu’hai toa una caña del árbol familiar que s’estendió al otru llau y que seique, namá seique, en dalgún de los sos frutos va llograr volver a casa.
Augusto Lazzarini, exalumnu del Colexu Ntra. Sra. de Cuadonga, Santa Fe, Arxentina.
