LNE /
Sorpresa na ría de Villaviciosa pola llegada de 51 flamencos: asina captó l’oxetivu de Xuan Cortés al numberosu grupu. Les
imaxes fueron tomaes esti domingu nel estuariu maliayés.
Villaviciosa ye testigu estos díes d’un acontecimientu escepcional: la llegada de 51 flamencos a la so ría. Trátase d’un fechu insólitu, una y bones esta especie escasamente déxase ver n’Asturies y «muncho menos en grupos tan numberosos». Agora bien, la presencia d’aves migratories d’orixe mediterráneu nel estuariu maliayés ye cada vez más habitual, destaquen los espertos.
El postreru flamencu rexistráu en Villaviciosa foi un exemplar nuevu que permaneció mientres dellos meses nel estuariu, a finales d’agostu de 2023. Sicasí, l’avistamiento actual, con 51 exemplares, podría constituyir el mayor rexistru de flamencos en territoriu asturianu.
La mayoría de los flamencos que se vieron agora na ría yeren nueves, acompañaos por unu o dos adultos. Gracies a les fotografíes tomaes esti pasáu domingu pela tarde pol ornitólogu local Xuan Cortés, púdose lleer l’argolla que portaba un exemplar adultu, lo que va dexar conocer nos próximos díes l’orixe esactu del grupu. Por proximidá xeográfica, embaráxase la posibilidá de que procedan del sur de Francia, concretamente de La Camarga, una de les zones más relevantes d’Europa para la observación d’esta especie.
Otra de les imaxes de los flamencos. / Xuan Cortés
Envalórase que los flamencos nun van permanecer enforma tiempu na ría, yá que al tratase d’aves migratories, ye probable que sigan la so ruta escontra’l Mediterráneu español o’l norte d’África, onde suelen pasar l’iviernu.
Pero los flamencos nun son solo la única especie migratoria que puede vese estos díes pola ría de Villaviciosa. Mientres tola selmana pasada tuvieron pasando bandos de «moritos», un ibis d’orixe mediterráneu que cada vez ye mas frecuente n’Asturies. Xuntu al bandu de flamencos tamién se repararon 32 «moritos» y 9 «espátules».
Grupu de flamencos na ría. / Xuan Cortés
Tamién na güelga del Cierrón, bien próximu al cascu urbanu de Villaviciosa, pueden reparase estos díes otres especies migratories de gran interés, entre les que destaquen el ruiseñor pechiazul, el combatiente y dos exemplares de correlimos pectoral, ave limícola procedente d’América del norte. Cada avistamientu na ría de Villaviciosa recuerda’l valor de caltener les güelgues como abelugos vitales para la biodiversidá.
La ría de Villaviciosa ye unu los estuarios meyor calteníos y de mayor valor ambiental de la mariña Cantábrica. Con aprosimao 8.000 m de llargor y una amplitú que bazcuya dende 1.000 a los 200 m, esti espaciu configuróse como un mediu natural onde vamos poder atopar sableres, dunes, estuariu y cantiles, nel cuál habiten aves acuátiques, invertebraos marinos, según distintes tipoloxíes de vexetación característica d’esti mediu.
Ye fundamental reseñar el relevante interés faunísticu, especialmente ornitolóxicu, de la Ría de Villaviciosa, yá que s’atopa nuna situación entemedia ente les rutes migratories. Dende 1995 esti espaciu ye una “Reserva Natural Parcial” y ta incluyida na na llista de Güelgues d’Importancia Internacional (RAMSAR).
