L’artista asturiana Tania Blanco llevó’l VIII Premiu Muséu Barjola col so proyectu «Gas, óxido, sal», creáu específicamente pa la Capiya de la Trinidá. El xuráu destacó la so capacidá pa resignificar los materiales y residuos industriales del paisaxe asturianu, con una visión poética y crítica sobre l’antropocenu. El premiu, convocáu ta dotáu con 6.200 €. Más info: https://acortar.link/YTF4A2Tania Blanco lleva’l VIII Premiu Muséu Barjola con Gas, óxido, sal
- Cultura premia con esti gallardón la realización d’un proyectu espositivu creáu pa la Capiya de la Trinidá del Muséu Barjola de Xixón
El proyectu de l’artista asturiana Tania Blanco, Gas, óxido, sal, ganó la octava edición del Premiu Muséu Barjola d’artes plástiques. Esti gallardón que convoca la Conseyería de Cultura, Política Llingüística y Deporte concédese al meyor proyectu espositivu creáu específicamente pa la capiya de la Trinidá del Muséu Barjola de Xixón y ta dotáu con 6.200 euros.
El xuráu, presidíu pol director xeneral de Patrimoniu Cultural, Pablo León, alcordó por unanimidá que’l proyectu ganador d’esta edición seya pa la propuesta de la creadora Tania Blanco.
El xuráu destacó la so capacidá pa resignificar los materiales
y residuos industriales del paisaxe asturianu,
con una visión poética y crítica sobre l’antropocenu.
Trátase d’un proyectu qu’apurre narratives relevantes sobre l’alcuentru del paisaxe natural y industrial asturianu y la so percepción. Tania Blanco ye quien a resignificar, al traviés del arte, materiales y residuos que recuerden los efectos del antropocenu nel territoriu, nuna propuesta de calidá poética y crítica.
L’artista Tania Blanco
Tania Blanco (Uviéu, 1987) ye llicenciada en Belles Artes pola Universidá de Salamanca y tien un máster n’Educación Artística y Pedagoxía pola Universidá Complutense y otru de Diseñu Gráficu y Preimpresión pola Escuela Aula Creativa de Madrid. Completó dos ciclos superiores: ún de Grabáu y Estampación na Escuela d’Arte y Restauración de Llión, y otru de Cerámica Artística na Escuela d’Arte de Cádiz.
Tien una trayectoria espositiva yá abondosa, con muestres individuales dende’l 2012 a anguaño en galeríes y espacios espositivos d’Asturies, Castiella y Llión y Euskadi, siendo l’artista que representó a Asturies nel Festival Intercélticu de Lorient, na Bretaña francesa, nel 2019.
Col proyectu agora premiáu, amplía les sos últimes investigaciones sobre la contaminación industrial en Xixón, en concreto na zona d’Aboño y Sotiello. Centra l’atención en cómo los residuos industriales tiñen la contornada (murios, carreteres, güertes), evidenciando la entrada nuna dómina nueva, l’antropocenu, que s’afianza y fai visible nestos sitios onde la llinia ente l’espaciu natural y l’industrial empieza a desapaecer.
