Tenis: Carreño completa la histórica remontada.

Carreño completa la histórica remontada. L’asturianu tora a Moller y pon a España camín de la fase final de la Copa Davis en Boloni. El Comercio

Pablo Carreño completó lo qu’España nunca fixera na hestoria de la Copa Davis: llevantar un 0-2 en contra. L’asturianu, nel quintu y definitivu puntu de la eliminatoria énte Dinamarca, trunfó contra Elmer Moller (6-2 y 6-3) y clasificó a España pa la fase final del tornéu en Bolonia, del 18 al 23 de payares.

Tres l’impulsu de les victories nel dobles y, sobremanera, de Pedro Martínez salvando un puntu de partíu contra Holger Rune, Carreño remató’l trabayu con una contundente victoria énte un Moller apexáu pola presión y polos problemes na parte baxa del llombu. El danés, héroe en febreru contra Serbia, entró al partíu bien tarde, cuando Carreño yá-y arrampuñara’l primer set con dos frayatos de serviciu.

Ameyoró claramente nel segundu parcial, pero Carreño aguantó’l bastiazu, especialmente nun primer xuegu nel que salvó los únicos dos puntos de ‘break’ qu’enfrentó en tol partíu. De perder dalguna d’eses dos pelotes, daría nales a Moller, que paecía precisáu d’un estímulu que-y fixera desentemangase de los nervios. Sicasí, Carreño encargose de qu’esi momentu de cambéu nun esistiera y ensin tatexar cerró un trunfu históricu pa él, malapenes el segundu en Copa Davis dende 2021, y p’España que per primer vegada saborguia la remontada más difícil posible.

España xúnise na fase final a Italia, clasificada como anfitriona de la competición, y a Arxentina, Bélxica, Austria, Alemaña, República Checa y Francia, que vencieron esta fin de selmana en les sos respectives eliminatories.