Un total de 98.719 estudiantes empecipia güei el cursu escolar n’Asturies, que sigue amontáu’l gastu por alumnu. El Principáu contien llixeramente’l descensu de matriculaciones con respectu al añu anterior. La plantiya orgánica de profesoráu consta de 9.635 docentes, 113 más qu’en 2024 magar la baxada d’educandos. Actualidá Asturies /
- Un total de 98.719 estudiantes d’Infantil, Primaria, Secundaria y Bachilleratu empecipiaron güei el cursu escolar 2025-2026, qu’introduz la ufierta voluntaria del asturianu nel segundu ciclu d’Infantil y l’ampliación del serviciu de comedor a xunu y setiembre.
- La cifra global de matriculaciones supon un descensu del 1,19% con respectu al cursu anterior.
- Les etapes d’Infantil y Primaria suman 55.625 alumnos y alumnes, un 1,14% menos que’l cursu anterior.
- Esi porcentaxe ye de nuevu menor que nel cursu 2024-2025, que foi del 2,6% respectu al añu académicu anterior.
- Na rede pública contabilícense 39.549 estudiantes neses etapes y na enseñanza alcordada, los 16.076 restantes. Los descensos de matrícula fueron del 1,01% y el 1,45%, respeutivamente. Xixón repite como conceyu con más estudiantes d’Infantil y Primaria, con 14.654, siguíu per Uviéu, con 13.204, y Avilés, con 4.921.
- En Secundaria y Bachilleratu, inscribiéronse 43.094 estudiantes, un 1,26% menos que’l cursu anterior.
- Xixón vuelve encabezar la matriculación, con 12.059 estudiantes, siguíu d’Uviéu, con 10.341, y Avilés, con 3.963.
- Tocantes a la dotación de personal, la plantiya orgánica para’l nuevu cursu xube a 9.635 docentes, lo que supon una medría de 113 profesionales respectu al cursu anterior, un 1,2%, nun contestu de descensu de matriculaciones d’alumnáu.
Cuarta comunidá en gastu per alumnu. Per otru llau, el Principáu caltiense como la cuarta comunidá española con mayor gastu por estudiante nos centros d’enseñanza públicos, tan solo por detrás de País Vascu, Navarra y Cantabria. Asina lo reflexa’l Sistema Estatal d’Indicadores 2025, el documentu oficial del Ministeriu d’Educación, Formación Profesional y Deportes, publicáu esti branu y qu’analiza el cursu 2022-2023.
L’últimu datu oficial disponible –correspondiente a 2022—cifra ese gasto por alumnu en 8.588 euros, lo qu’equival a 488 euros más qu’en 2021 y a 1.661 euros más qu’en 2017, l’añu de referencia qu’apaez nel documentu.
