ALDERIQUE SOBRE L’ «ASTURIES LLITERARIA, ¿Ú TAMOS? ¿AÚ VAMOS?» con los prestixosos escritores asturianos Fulgencio Argüelles, Miguel Rojo y Blanca Fernández Quintana. Atenéu Obreru de Xixón Escuela de Comerciu, 2ª planta Martes 14 d’ochobre, 19:00 hores.
Convidamos a esti coloquiu a trés representantes reconocíos de les nuestres lletres pa planteganos la realidá de la nuestra lliteratura, ¿tien sentíu axetivala como asturiana cuando la creación ye un talentu universal?, ¿qué valor diferencial apurre la llingua a la lliteratura asturiana, por qué sigue siendo asturiana anque tea escrita en castellán?, ¿qué papel xueguen la memoria, la tradición, los raigaños, el paisaxe o la identidá nel trabayu lliterariu? Etc…
Contamos pa esti alderique con trés autores asturianos premiaos por distintes instituciones:
• FULGENCIO ARGÜELLES (Uriés, Serrapio, Ayer, 1955), autor de llarga trayeutoria, empezó colos rellatos curtios y dempués vinieron les noveles, los artículos d’opinión y la crítica lliteraria, siendo premiáu en toles modalidaes. Ye ún de los grandes narradores de la lliteratura asturiana contemporánea. Anque la mayor parte de la so obra ta escrita en castellán, fizo tamién delles incursiones n’asturianu. Psicólogu de formación, vivió en Madrid munchos años enantes de tornar a la Cenera de so infancia, onde vive anguaño.
Destaquen na so producción noveles premiaes como «Letanías de lluvia» (Premiu Azorín), «Recuerdos de algún vivir» (Premio Principáu d’Asturies) o «El palacio azul de los ingenieros belgas» (Premiu Café Xixón), caracterizaes pola so evocación de lo rural y lo humano, y rellatos como «Del color de la nada» o «Seronda». La so última novela ye «El desván de las musas dormidas» (Acantilado, 2025).
• MIGUEL ROJO (Zarracín, Tinéu, 1957) representa’l mestizaxe de llingües: escribe n’asturianu y en castellán, cubriendo casi tolos xéneros, dende la novela a la poesía, el cuentu y la lliteratura infantil. Doctor en Bioloxía y profesor de secundaria, la so obra ye de les más granibles y premiaes del momentu cultural que conocemos como el “Surdimientu”, con títulos clave como «Asina somos nós» (Premiu Xosefa Xovellanos), «Histories d’un seductor (memories d’un babayu)» (Premiu Narraciones Trabe) y poemarios como «Buscador d’estrel.las» (Premiu Fernán Coronas). El rellatu sobre «Xicu’l toperu» foi lleváu al cine, nun curtiumetraxe de Gonzalo Tapia. L’estilu modernu y la visión universal de Miguel Rojo arriquecen el nuestru panorama lliterariu.
Llogró’l Premiu de la Crítica d’Asturies en poesía y lliteratura infantil en 2005 y 2008.
La so última obra narrativa en castellán ye «Pequeños barcos a la deriva» (2021). Y, n’edición billingüe, espublizó la obra poética «La edá de la memoria» en Trabe (2024).
• BLANCA FERNÁNDEZ QUINTANA (Bimenes, 1994) ye la voz más nueva de la mesa. Graduada n’Estudios Clásicos y Románicos pola Universidá d’Uviéu ye profesora de secundaria y escritora tanto en castellán como n’asturianu. Algamól’I Premiu Enriqueta González Rubín de narrativa moza con «No que cinca los seres de lleenda» y foi la ganadora del XV Premiu Xosefa Canellada de lliteratura infantil y xuvenil por «El cartafueyu d’alquimia» y del I Premiu Radagast por «Trovadoresca». Tien participao n’antoloxíes como l’Excelsius 2025, Canallas, Paisajes de acero y sueños o Nosotres. «Las que no olvidaron» ye la so primer novela en castellán, sobre un futuru planetariu distópicu, espublizada esti mesmu añu.
Pola so trayeutoria lliteraria y pol so activismu pa col asturianu, recibió’l XV Premiu Ostana Xoven (Piamonte, Italia) y el II Premiu Ondras (Cerdeña, Italia). Esti premiu ye una reconocencia añal otorgada en Cerdeña p’afalar y protexer les llingües y cultures minoritaries europees. Ensin dulda, Blanca Fernández Quintana ye una referencia en nueves temátiques y, perimportante, atraye a nuevos llectores a la lliteratura n’asturianu.
