La etóloga y primatóloga británica Jane Goodall finó esti miércoles a los 91 años por causes naturales, según informó nes sos redes sociales l’institutu que lleva’l so nome y que ella mesma fundó en 1977 coles mires de promover la protección de los ecosistemes y la biodiversidá.
Mensaxera de la Paz de les Naciones Xuníes, Goodall destacó polos sos métodos innovadores y unos fascinantes descubrimientos sobro la conducta de los chimpancés selvaxes en Gombe (Tanzania). Nel momentu del so fallecimientu, atopábase en California como parte de la so xira de conferencies per Estaos Xuníos.
- Jane Goodall: wiki / semeyes /
- Dr. Jane Goodall & the Jane Goodall Institute/#JaneGoodall & the Jane Goodall Institute.
- Fb: facebook.com/janegoodall & facebook.com/janegoodallinst.
- TikTok & IG: @janegoodallinst/janegoodall.org
Adiós a Jane Goodall, “la voz de los chimpancés”. En 2003 foi galardonada col Premiu Príncipe d’Asturies d’Investigación Científica y Técnica. El xuráu destacó que “Los trabayos de la doctora Goodall, a los que dedicó la so vida de manera exemplar ya inclusive nes más adverses condiciones, constitúin una trascendental aportación científica para entender los raigaños del comportamientu y la cultura humanes”. N’Uviéu oyemos per primer vegada’l so ‘saludu chimpancé’.
Diz el famosu “principiu de Planck” que la ciencia progresa “funeral a funeral”, porque tien de morrer una xeneración, ronciega siempres a los cambeos y a les nueves idees, por que la siguiente acepte con naturalidá les meyores. Nel casu de Goodall nun foi necesariu, porque llogró l’ésitu inmediatu cola complicidá d’un públicu esteláu colos sos documentales para National Geographic.
“Adoptó un métodu nada ortodoxu, somorguiau por completu nel hábitat de los chimpancés, pudo esperimentar de primera mano una sociedá tan complexa más como miembru d’ella que como observadora distante, y desafió los convencionalismos científicos al dar a cada unu d’ellos un nome en cuenta de un númberu”, esplicaba un testu del Jane Goodall Institute.
“Nun los entendió solo como especie, sinón como individuos con distintes personalidaes, mentes complexes, emociones y venceyos sentimentales duraderos. Los sos descubrimientos sobro l’habilidá de los chimpancés pa fabricar ferramientes siguen siendo de los más importantes nel ámbitu de la primatología”, añedía.
