Vamos encarar el día con unes condiciones meteorolóxiques bien distintes a les que vivimos esta selmana. El pasu d’un frente fríu n’altor va condicionar claramente l’estáu del tiempu. Los cielos van tar bien nublos y van dexar precipitaciones que van empezar entrando pol occidente y van dise estendiendo al restu. Asina tou, va ser nel sector occidental onde van ser más frecuentes. Los vientos van predominar de sur-suroeste con raches que podríen aportar a localmente fuertes nel cordal, pudiendo algamar los 90 km/h. Nel restu de la rexón van ser moderaos a lo sumo. Les temperatures máximes van baxar de forma xeneralizada. Concretamente, van baxar hasta 4 o 5 ºC respectu al sábadu, siendo’l descensu más nidiu cuanto más movamos escontra la mariña.
Sicasí, les temperatures mínimes van xubir hasta 4 ºC más que’l sábadu gracies al predominiu de vientos de componente sur. Mañana llunes volverán baxar les máximes y, nesti casu, tamién lo fadrán les mínimes nel centru y nel oriente asturianu. Los cielos para mañana van presentar nubes y escamplaes con posibilidá de dellos bastios a partir de la tarde. Los vientos espérense de componente oeste moderaos.
