Esperamos un día estable en tol Principáu d’Asturies. Pela mañana, a lo sumo, vamos ver intervalos de nubes altes ensin importancia que, como ye habitual d’esti tipu de nubosidá, nun van dexar agües. A lo llargo de la segunda metá del día vamos reparar cómo los cielos van estenase de nubes polo que’l sol va ser el gran protagonista de la tarde. Los vientos van ser fluexos predominando de noroeste. Les temperatures máximes apenes van variar, ente que les mínimes van baxar llixeramente nel interior y van caltenese na mariña y contorna.
El sábadu, sicasí, prevese mayor *nubosidad que van poder dexar precipitaciones débiles que van percorrer la rexón. Les temperatures máximes van baxar ente 2 y 3 graos na metá occidental y de forma más llixera na oriental. Tocantes a les mínimes van xubir en tol interior calteniéndose na mariña. Cielos nublos tamién pal domingu con probabilidá de precipitaciones.
