Una umbada atlántica dirá averándose y va traer la presencia de cierta nubosidad a lo llargo del día. Van ser nubes de tipu altu mientres la mañana y de tipu mediu a partir de la tarde. Pero va ser nubosidad ensin importancia cuidao que nun va xenerar inestabilidá. Mientres esta próxima madrugada de martes a miércoles sí que yá s’esperen dellos bastios que van ser más probables y frecuentes nel occidente y nel cordal, ensin refugase n’otres zones de la rexón. Tocantes a los vientos para güei martes, prevense de sur moderaos nel cordal, fluexos y variables nel restu del interior y de componente este na mariña. Les temperatures máximes van xubir hasta 3 o 4 ºC, sobremanera nel interior, y tamién van xubir anque llixeramente nel casu de les mínimes.
El miércoles vamos encarar un día con nubes medies pela mañana ensin refugase dalgún bastiu, y nubes muncho más compactes y de tipu baxu mientres la tarde con precipitaciones más xeneralizaes. Los vientos volverán soplar de sur nel cordal y tamién lo fadrán nel sector occidental con raches moderaes. Pela tarde los vientos van afitar de noroeste, momentu nel que van entrar les nubes baxes enantes mentaes y que van dexar más agües. Les temperatures máximes van xubir na mariña, van baxar nel suroccidente y van caltenese ensin cambeos nel restu. Les mínimes van xubir de forma xeneralizada y notable en tola Comunidá Autónoma.
