Esperamos una xornada marcada polos vientos de sur-suroeste que van soplar con cierta intensidá. Les raches van ser localmente fuertes nel cordal y tamién n’otres zones espuestes del sector occidental. Nel restu de la rexón les raches van ser moderaes pudiendo algamar los 60 km/h. L’Axencia Estatal de Meteoroloxía va tener activáu l’avisu mariellu hasta les 15:00 hores de la tarde nel cordal por raches que podríen rexistrar los 90 km/h. Ello ye que según los modelos meteorolóxicos, ye probable qu’en puntos de Picos d’Europa puédanse inclusive algamar los 100 km/h.
En cuanto al estáu de los cielos, como vien siendo habitual en situaciones nes que soplen con intensidá los vientos de sur-suroeste, les nubes van quedar acutaes nel so mayor parte nel suroeste y nel cordal onde nun se refuga que pueda escapase dalguna gota mientres el día. Nel restu les nubes van ser de tipu altu que podríen, a lo sumo, dexar el cielu atapecíu. Les temperatures máximes van xubir llixeramente en tola mariña y tamién en zones del centru del Principáu, ente que nel restu apenes van variar respectu al xueves. Les mínimes van xubir de forma notable y xeneralizada pudiendo rexistrase hasta 6/8 ºC más altes gracies los vientos de componente sur enantes mentaos.
El sábadu preven cielos bien nublos con precipitaciones pela mañana que van percorrer la rexón d’occidente a oriente. Estes agües van unviar mientres el día salvu nel sector oriental onde entá podríen esperase pela tarde. Les temperatures van baxar tanto les máximes como les mínimes.
