Actualidá / Videu / Mediu Rural llibera a la osezna Alba nun hábitat fayadizu pal so desenvolvimientu en completando’l so periodu d’aclimatación. L’animal, rescatáu por Axentes del Mediu Natural en Teberga n’abril, pasó seis meses de recuperación nos centros de Villaescusa, en Cantabria, y Valsemana, en Llión.
La Conseyería de Mediu Rural y Política Agraria lliberó güei a la cría d’osu pardu cantábricu Alba nun hábitat aparente pal so desenvolvimientu: una zona pocu poblada y con abondosu alimentu. L’esbardo, de 36 quilos, presenta condiciones favorables pa la so reintroducción nel mediu natural, tres seis meses de recuperación, primero nun centru de Cantabria y, darréu, n’otru na provincia de Llión.
Los axentes del Mediu Natural rescataron a la osezna en Teberga’l pasáu mes d’abril, en constatando que nun tenía posibilidá de realcontrase cola so madre en condiciones de seguridá. Bautizada como Alba, el so afayu enmárcase nel programa de siguimientu d’oses con cría que realiza’l Principáu.
Tres una primer revisión nuna clínica veterinaria d’Uviéu, na que se constató l’ausencia de feríes o patoloxíes, l’animal, de 2,1 quilos de pesu, foi treslladáu al Centru de Recuperación de Fauna Montesa de Villaescusa, xestionáu pola Conseyería de Desenvolvimientu Rural, Ganadería, Pesca, Alimentación y Mediu Ambiente del Gobiernu de Cantabria.
Trés meses dempués, el 24 de xunetu, Alba llegó a la cortil d’aclimatación d’osos pardos allugáu nel monte de Valsemana, en Llión. Nesi equipamientu, dependiente de la Conseyería de Mediu Ambiente, Vivienda y Ordenación del Territoriu de la Xunta de Castiella y Llión, permaneció trés meses, hasta completar la so aclimatación al mediu natural. Nesti periodu, la osezna aprendió a desenvolver les sos capacidaes de supervivencia, xixilada en tou momentu por cámares de siguimientu.
Estes actuaciones llevarense a cabu de manera coordinada ente les trés alministraciones autonómiques, que trabayen conxuntamente pol bienestar d’estos animales.
Amás, el Gobiernu d’Asturies estima la collaboración d’organismos como la Fundación Oso Pardo, la Fundación Oso Asturies, el Conseyu d’Investigaciones Científiques (CSIC), el Ministeriu pa la Transición Ecolóxica y el Retu Demográficu, el Serviciu d’Emerxencies del Principáu (Sepa) y los Axentes del Mediu Natural, qu’en tol procesu formaron parte del operativu coles mires de facilitar el bienestar del animal.
Con Alba yá son seis los esbardos que’l Principáu lliberó desque en 2019 empezaren a utilizase les instalaciones d’aclimatación, que s’afixeron pa poder allugar exemplares d’osu pardu en semilibertá, mientres la fase previa a la so lliberación. La primera foi Saba, en 2019, que darréu llogró reproducise en llibertá. Siguiéronlu Éndriga, en 2020, y dos años dempués Martín, procedente de la localidá lleonesa de San Martín del Moru Toledanu. En 2024, Cova, otra osezna asturiana, y l’esbardo lleonés Barniedo, tamién s’aclimataron en Valsemana.
