La música tien presencia’l domingu 2 nel I Festival de Lliteratura Social d’Asturies que se celebra esta selmana nos Kuivi Almacenes d’Uviéu.
Dende’l miércoles 29 d’ochobre al domingu 2 de payares los Kuivi Almacenes d’Uviéu van acoyer la primer edición de Pan y Roses, el primer festival de lliteratura social d’Asturies. La música va tar presente nel eventu con un conciertu d’Antón Menchaca, un alderique nel que participen Marina Pangua (La Ciudá nel Mar) y Natalia González (Ochobre) y una actividá pa la reciella de David Varela.
El domingu 2 entamen les actividaes rellaciones cola música nesti festival entamáu pola editorial Hoja de Lata y sofitáu cola Axenda 2030 y la Conseyería d’Ordenación de Territoriu, Urbanismu, Vivienda y Derechos Sociales. El conciertu del dúu d’asturianada renovada Antón Menchaca va ser el domingu 2 de 14h a 16h. N’acabando, Marina Pangua y Natalia Ochobre intervienen nel alderique ¿Pa quién escribe una moza asturiana anguaño? y de 17.30h a 19h David Varela va facer un taller d’instrumentos tradicionales sostenibles pa la reciella.
Amás d’estes actividaes va haber otra montonera d’elles dientro d’esti I Festival de Lliteratura Social d’Asturies, que se presenta como un proyectu que tien a la «sostenibilidá social, sostenibilidá ambiental y sostenibilidá económica como exes vertebradores», amás de defender los valores de «democracia, xusticia social, igualdá, feminismu, inclusividá, diversidá, ecoloxía y asturianía».
