El Muséu del Pueblu d’Asturies acueye esti sábadu 4 d’ochobre una edición nueva del Día de la Reciella, eventu que vien faciéndose dende 2013 pa poner en primer planu la importancia de la tresmisión interxeneracional de la llingua asturiana.
- Skama la Rede con ‘Entaína‘;
- David Varela con ‘N’asturianu, sumes‘;
- Pop Piquiñín con ‘Espoxiga‘;
- Alicia Álvarez con ‘Préstame pola vida‘;
- Xaime Martínez con ‘L’asturianu sal con nós‘;
- Alfredo González con ‘L’asturianu conéctate‘;
- Manuela, Esther y Nacho Fonseca con ‘La familia del asturianu crez‘
- Mostru l’Horru con ‘Xugando n’equipu‘.
Pa ello l’asociación Reciella de families pol asturianu entama la carrera Entaína y ufierta actividaes deportives, d’ociu, musicales y talleres; toes elles de baldre y n’asturianu. Nesta décimosegunda edición el son van ponelu la Banda Gaites Saxum y DJ Furo, amás va desendolcase’l taller Panderetiando y va haber baille y danza prima pa zarrar la xornada.
«Siguimos semando» ye’l llema d’esti XII Día de la Reciella que va arrancar a les once la mañana cola inscripción y el repartu de dorsales de la carrera Entaína, na que trés xeneraciones d’una familia de Reciella pásense simbólicamente’l testigu del asturianu. Llueu va haber una montonera d’actividaes ente les qu’hai talleres, mercadín d’empreses qu’usen l’idioma’l país o un mundialín de fútbol.
La música asturiana vuelve a tar presente un añu más nesti eventu. Nesta ocasión va haber, a les 13.30h, una actividá abierta pa tol grupu familiar de baille tradicional siguida d’un vermú musical a les 14.45h al cargu de DJ Furo. Yá pela tarde, a les seis, Xabel Álvarez Miranda -en colllaboración con Cartonajes VIR- va desendolcar el taller de panderu Panderetiando y la Banda Gaites Saxum actúa a les 18.45h. A les siete y media la tarde ponse’l ramu a la xornada baillando una danza prima nel Muséu del Pueblu d’Asturies.
Ensin cantar oficial
Al Día de la Reciella acompañólu davezu un cantar y un videoclip que punxo banda sonora a esta celebración de la tresmisión interxeneracional de la llingua asturiana. Nesta edición nun va haber cantar, sicasí la organización del eventu va trabayar pa retomar esta iniciativa en próximes ediciones. Ye una acción qu’afonda nel papel normalizador que tien la música pa les nueves xeneraciones d’asturfalantes y pa la que n’años anteriores participaron Skama la Rede con ‘Entaína‘; David Varela con ‘N’asturianu, sumes‘; Pop Piquiñín con ‘Espoxiga‘; Alicia Álvarez con ‘Préstame pola vida‘; Xaime Martínez con ‘L’asturianu sal con nós‘; Alfredo González con ‘L’asturianu conéctate‘; Manuela, Esther Fonseca y Nacho Fonseca con ‘La familia del asturianu crez‘ y Mostru l’Horru con ‘Xugando n’equipu‘.
El Día de la Reciella ta entamáu por Reciella y ye un eventu que foi sumando reconocimientu y sonadía a lo llargo de más d’una década. En 2018, l’Ayuntamientu de Xixón, qu’apoyó esti eventu al traviés de la FMCYUP dende la primer edición, aprobó una declaración institucional de sofitu al Día de la Reciella, reconociendo l’interés y la importancia de la tresmisión interxeneracional del asturianu, l’arraigu d’esti eventu nel panorama d’actividaes en Xixón y la secular rellación de la llingua asturiana col conceyu de Xixón. Dende la edición de 2022 esti eventu incorpora tamién el sofitu del Gobiernu del Principáu d’Asturies al traviés del programa Asturies Cultura en Rede, que se renueva en 2025.
Programa completu
| 11.00 | Inscripción y recoyida de dorsales de VI Entaína |
| 11.30 | Salida de la VII Entaína |
| 12.00 | Llegada Entaína y entrega avituallamientu |
| 12.15 | ¡Deprendemos a facer chapes! [Taller mañana] Entama: ADAE |
| 12.45 | Bordáu a puntu de cruz [Taller] Collabora: Ringo Rango |
| 13.30 | Baille en familia Entama: Reciella |
| 14.15 | Sesión vermú musical Collabora: DJ Furo Posa y xinta |
| 16.00 | Mundialín interReciella de fútbol comentáu [ANFITEATRU] Entama: Reciella |
| 16.30 | ¡Siguimos faciendo chapes! [Taller tarde] Entama: ADAE |
| 17.15 | Falar n’asturianu ye de xules [Charra y taller] Collabora: Asturxules |
| 18.00 | Panderetiando [Taller Pandeiru] Entama: Xabel Álvarez Miranda (Reciella) Collabora: Cartonajes VIR |
| 18.45 | Actuación Banda Gaites Saxum Entama: Banda Gaites Saxum |
| 19.30 | Danza Prima y Pieslle |
