Educación y la Fiscalía van dar a conocer el Ministeriu Públicu a los estudiantes y van encetar temes como la edá penal o los riesgos de les redes sociales. Les charres, dirixíes a alumnáu de Secundaria y Bachilleratu, van impartise nos centros a partir de xineru, previa inscripción. La primer edición se circunscribirá a los colexos ya institutos del conceyu d’Uviéu. Actualidá
La conseyera d’Educación, Eva Ledo, y el fiscal cimeru del Principáu d’Asturies, Gabriel Bernal, presentaron güei el proyectu Una charra col fiscal, que’l so oxetivu va ser averar a los estudiantes de Secundaria Obligatoria y Bachilleratu la figura y el llabor del Ministeriu Públicu, amás d’esplica-yos cuestiones del so interés, como la edá penal o los riesgos de les redes sociales.
La iniciativa parte de la mesma Fiscalía asturiana, dientro de la so nueva política de comunicación y acercamientu a la ciudadanía, y cuenta cola collaboración del Gobiernu del Principáu. Les charres van empezar a impartise a partir de xineru de 2026, a suxerencia de la Conseyería d’Educación, para nun coincidir con otros proyectos yá confirmaos.
Nesta primer edición, l’actividá se circunscribirá a los centros educativos públicos y alcordaos del conceyu d’Uviéu, a los que se van mover los fiscales. Los colexos ya institutos comenenciudos pueden solicitar la so participación hasta avientu, al traviés de la Oficina de Comunicación de la Fiscalía. La conseyería va facilitar el contactu colos centros d’enseñanza del conceyu, amás d’espublizar l’actividá nel portal Educastur.
Dos formatos distintos
El proyectu tien dos formatos: unu destináu a alumnáu de 2º a 4º de Secundaria y otru dedicáu puramente a los estudiantes de Bachilleratu. Dambos van esplicar la figura y la función del Ministeriu Fiscal, el gran desconocíu de l’Alministración de Xusticia.
Amás, el primer formatu -tituláu Una charra col fiscal: construyendo un futuru seguro- va encetar cuestiones como la edá na que pasen a ser *criminalmente responsables (14 años) y les consecuencies penales de los sos actos, los riesgos de les redes sociales, l’acoso escolar o la delincuencia xuvenil, tollo dende la perspectiva del fiscal.
L’actividá para alumnáu de Bachilleratu, titulada Una charra col fiscal: más allá de les películes, va tar más empobinada a dar a conocer la institución de cara a una posible salida profesional.
Tantu Ledo como Bernal destacaron el valor d’esti proyectu educativu pola so implicación na concienciación y ayuda na prevención del delitu dende edaes tempranes y el so llabor divulgativu.
