El Teatru Vital Aza acueye’l 7 de payares la gala final del XVII Premiu Camaretá al Meyor Cantar. Los grupos y músicos finalistes son Héctor Braga, Ferla Megía, Herbamora y Lïbre. Cultura presenta’l videoclip d’Odisea la nuí, tema col que La Bonturné llogró’l XVI Premiu Camaretá.
El certame, dotáu con 6.000 euros, va reconocer un añu más la creación musical n’asturianu y eonaviegu, y nesta edición cuenta con Héctor Braga, Ferla Megía, Herbamora y Lïbre como finalistes. Na gala, retresmitida per RTPA y con entrada llibre hasta completar aforu, va dase a conocer el fallu del xuráu, y el públicu va poder disfrutar amás del conciertu de La Bonturné, el grupu ganador de la pasada edición col tema Odisea la nuí.
El xuráu del XVII Premiu Camaretá encargáu de seleccionar les candidatures finalistes ta integráu pola cantante Alicia Álvarez, el periodista Xicu Ariza, la técnica de normalización llingüística Penélope Miranda, la filóloga y gaitera Andrea Joglar y la profesora Emma Posada.
Cultura convoca esti gallardón col oxetivu de consolidar, prestixar y arriquecer la creación musical n’asturianu y eonaviegu. Amás, la propuesta ganadora va formar parte del circuitu Autores nel Camín, que promueve actuaciones en distintos conceyos dientro del programa Asturies, Cultura en Rede.
Los cuatro temes finalistes d’esta edición son:
- Héctor Braga, con Valiente. Referente consolidáu de la música asturiana, con siete discos publicaos y numberosos reconocimientos poles sos creaciones musicales y ensayístiques.
- Ferla Megía, con Xatu. Creador d’atmósferes y una de les voces más inquietes de la escena actual, fusiona soníos urbanos y tradicionales. El cantar forma parte del so EP Páxaros 01.
- Herbamora, con Eclipse total. Grupu de cinco pandereteres y cantantes qu’actualicen la tradición de la pandereta. Ganadores del premiu en 2007, presenten el so tema dientro del álbum 286 Llunes.
- Lïbre, con L’ablugada. Formación reciente con miembros de Mala Reputación, Misiva, Origen y Desakato. Nel so EP Ciudadano Lunar esploren del pop alternativu al rock d’autor.
Presentación del videoclip de La Bonturné
Como preludiu a la gala, esta mañana presentóse’l videoclip del tema Odisea la nuí, del grupu La Bonturné. El film musical foi realizáu por Javier Lueje y dau a conocer nun actu en Llaboral Ciudá de la Cultura nel que participó Antón García, director xeneral d’Acción Cultural y Normalización Llingüística; el propiu Lueje, como director y realizador del videoclip; y miembros del grupu.
