Esti domingu vamos tener l’aire frío n’altor que se ta retirando y les altes presiones fortaleciéndose na Península mientres el día. Ye por ello polo qu’esperamos meyor tiempu anque, como vamos ver, entá va haber cierta probabilidá d’agües débiles. Vamos amanecer con cielos pocu nublos o, a lo sumo, con nubes altes que van dexar los cielos atapecíos. A partir del mediudía y primeres hores de la tarde nun se refuga un aumentu de la nubosidá que podría dexar dellos orbayos esvalixaos na rexón pero que, comoquier, van unviar rápido para dar pasu a un restu de la tarde y nueche con menos nubes. Ello ye que espérase que los cielos tean estenaos a la fin del día. Los vientos van predominar de suroeste-oeste con posibles raches moderaes nes zones más espuestes. Les temperatures nun van esperimentar cambeos importantes pero, asina tou, van tender a baxar bien llixeramente tanto nel casu de les máximes como nel de les mínimes.
El llunes vamos empezar la selmana con total estabilidá dende primer hasta última hora del día. Los cielos van tar poco nublos o estenos. Les temperatures máximes van xubir notablemente nel suroccidente, de forma moderada nel cordal y llixera nel restu. Les mínimes entá podríen siguir baxando un poco más. Bon tiempu tamién para’l martes con un nuevu ascensu de les temperatures máximes.
