Volveremos encarar otru día onde los fuertes vientos volverán ser protagonistes. Hasta les 18:00 hores va tar activáu l’avisu naranxa nel cordal por raches que podríen algamar los 100 km/h y, a partir de les 18:00 hores l’avisu va pasar a nivel mariellu por raches d’hasta 90 km/h. Nel suroccidente asturianu l’avisu mariellu va tar activáu hasta’l mediudía por raches tamién d’hasta 90 km/h. Dellos modelos meteorolóxicos apunten a la posibilidá de que, independientemente de los avisos oficiales de l’Axencia Estatal de Meteoroloxía, en zones altes del cordal oriental podríen llegar a rexistrase raches d’hasta 130 o 140 km/h mientres la primer metá del día.
Conforme meyora la tarde, les intenses raches van dir a menos anque, comoquier, van siguir siendo fuertes. Nel restu d’Asturies superarán los 60 km/h pudiendo haber zones nes que se van averar a los 80 km/h, especialmente, nes hores centrales. En cuanto al estáu de los cielos, prevense nubes medies y altes con bastios en tola metá sur y, de forma más esporádica, nun se refuga dalgún bastiu nel restu. Les temperatures máximes van ser similares a les del martes, ente que les mínimes van xubir nel norte y nel oriente, y podríen baxar nel sector occidental.
El xueves, día nublu pela mañana con agües xeneralizaes que van unviar pela tarde pudiendo abrise claros. Temperatures en descensu y vientos moderaos de componente oeste.
