Tras queden díes térmicamente prestosos con vientos de componente sur, y encaramos agora una selmana realmente fría que va tener el so puntu álxido el xueves y el vienres. El llunes yá se preven precipitaciones xeneralizaes que lleguen dende’l norte y, sobremanera pela mañana, podríen ser significatives con intensidá de 8-10 llitros per metro cuadráu a la hora. A lo llargo de la tarde los bastios, yá más intermitentes, van ser de calter más débil pero entá van siguir presentes. Los vientos van soplar de norte tendiendo a nordeste y de esti a la fin, moderaos pela mañana y más fluexos a la fin. Les temperatures máximes van baxar más de 3 ºC na metá oriental, y de 1 o 2 ºC nel restu salvu nel suroeste onde se van caltener ensin cambeos. Les mínimes van baxar llixeramente.
El martes va ser un día frío pero estable polo xeneral. Asina tou, nun se refuga que pueda escapase delles agües na metá oriental asturiana. Les temperatures van siguir baxando.
Pero a partir del miércoles a partir del mediudía, va entrar xuna irrupción d’aire frío que se va enllargar hasta’l vienres incluyíu. Entá ye llueu para detalles pero tou apunta a que vamos poder ver nevar, y con bayura, a partir de los 600/700 metros d’altor.
L’Axencia Estatal de Meteoroloxía (Aemet) comunicó que s’avera una masa d’aire «bien frío» procedente de llatitúes altes que va faer que los termómetros baxen de forma progresiva. Van baxar tantu que, según los espertos, podrán producise temperatures propies del iviernu, esto ye, «baxes para la dómina». Esta situación podría poner fin a l’atípica seronda que se ta viviendo n’Asturies y que ta dexando díes en plenu payares con máximes que superen los 20 graos.
La masa d’aire frío yá empezó a notase, anque llevemente, y les zones más poblaes d’Asturies anotaron mínimes de 9 y 10 graos n’Uviéu y Xixón, respectivamente —llueñe del rexistru más baxu de la rexón: 1ºC en Vega d’Urriellu—. El descensu va ser progresivu, con posibles xelaes dende’l martes, hasta llegar al xueves, cuando les temperatures van esbarrumbase y podríen producise les primeres nieves de la temporada a partir de los 600 o 700 metros d’altor.
