Prevense nuevamente cielos bien nublos con precipitaciones xeneralizaes que podríen ser localmente moderaes. Esta inestabilidá va ser más abondosa pela mañana, pero pela tarde entá va siguir presente anque con enclín a unviar a la fin del día. Nun se refuga inclusive que s’abran claros pela nueche. La cota de nieve va bazcuyar ente los 800 y los 1000 metros en función d’onde atopemos, siendo l’oriente asturianu’l sector onde se va alcontrar la cota más baxa y l’occidente la más alta. L’avisu meteorolóxicu nel cordal, de nivel mariellu, va enllargase hasta les 18:00 hores de la tarde. Los vientos van soplar de componente norte moderaos, afloxando a la fin del día. Les temperatures máximes van ser similares a les del xueves, ente que les mínimes van poder baxar un pocu siquier nel centru y nel oeste del Principáu.
El sábadu vamos empezar el día con poques nubes pero, mientres la tarde, va aumentar la nubosidá y van llegar agües que van entrar pol occidente y van movese por tola Comunidá Autónoma. Estes agües van tar acomuñaes a un frente templáu. Poro, non solo nun s’espera nieve sinón que podrá dilise la nieve cayida d’estos díes tras. Los vientos van soplar de suroeste moderaos. Asina tou, la mañana va ser bien fría pero les máximes van xubir hasta 4 ºC más al respective de les qu’anotemos esti vienres.
