Tres unos díes fríos n’Asturies, esti sábadu vamos notar un ascensu significativu de les máximes gracies a un predominiu de vientos de suroeste. Con éses vamos amanecer con intervalos de nubes altes ensin posibilidá dalguna de precipitaciones. Conforme meyora’l día ye posible que yá vaigamos viendo nubes tamién de tipu medio entrando pel oeste. Mientres la tarde se preven precipitaciones débiles que van poder afectar a cualquier puntu pero, asina tou, van ser menos probables y frecuentes cuanto más movamos escontra l’oriente y norte de la rexón. Van ser unes agües acomuñaes a un frente templáu y ye por ello polo que van xubir les temperatures máximes güei sábadu. Van xubir hasta 6 ºC nel oriente, hasta 4 o 5 ºC nel centru y hasta 2 o 3 ºC nel occidente respecto al vienres. Les mínimes, que van tener llugar a primer hora de la mañana, van ser daqué más baxes que les d’esti vienres.
Concretamente, prevese que baxen hasta 2 ºC y, inclusive, hasta 3 o 4 ºC nel terciu sur. Los vientos, como mentábamos antes, van predominar de suroeste especialmente a partir del mediudía con posibilidá de raches moderaes mientres la tarde.
El domingu vamos siguir con vientos de suroeste y mayor *nubosidad escontra’l cordal y l’occidente onde nun se refuguen precipitaciones. Tiempu más estable nel restu d’Asturies. Les temperatures máximes van xubir 3 o 4 ºC más, ente que les mínimes van xubir espectacularmente hasta 10 ºC más que güei sábadu.
