- Alborecemos col cielu nuboso dempués d’una nueche de sobresaltos na comarca d’Avilés por mor d’una tormenta estática que se cebo nesa fastera, descargando más de 100 l/m2 en malpenes dos hores, situación que nun foron a predecir los modelos meteorolóxicos y provocando munches incidencies esta pasada nueche. Agora paez que nun llueve y tenemos unes temperatures que tan alrodiu de los 11ºC, rexistrándose nel puirtu Payares 3,2ºC.
- Güei vamos tener una mañana seliquina ente nubes ya claros o abancios pa dir aumentando la nubosidá pela tarde cuando tendremos xarabatos, sobre too na fastera oriental, onde puen tener calter fuerte, nel restu sedrán menos abondosos y más febles. Les temperatures en descensu y la nieve surdirá perriba de los 1800m al escurecer. L’aire sedrá de nordés con dalguna racha moderada nel llitoral y zones espuestes.
- Mañana martes va tar poco nuboso pela mañana y les temperatures mínimes descenderán moderadamente, mentandu les másimes van camudar poco. Yá de tarde dirá n’aumentu la nubosidá pa dexanos el día nuble. L’aire sedrá sele ya variable.
- El miércoles mos llega una masa d’aire fríu pel norte que va desestabilizar abondu’l tiempu anque nun lo notaremos hasta pola tarde cuando entamará a llover y baxar les temperatures con una cota de nieve que rondará los 1500m anicialmente pa baxar al finar el día sobre los 1100m.
- El xueves sedrá un día ivernal con xarabatos que nel llitoral vendrán acompangaos de truena y xarazu, sobre too pela tarde cuando sedrán más frecuentes y abondosos, amás les temperatures descenderán bultablemente y la nieve surdirá perriba de los 700-800m.
- Situación que va estendese a gran parte del vienres. Asina y too, los modelos meteorolóxicos esta mañana pegaron un bon recorte a esta situación que pue camudar en les siguientes salides polo que tar atentos al pronósticu.
