Movilidá activa’l plan de vialidá ivernizu para garantizar la seguridá nes carreteres mientres los episodios de meteoroloxía adversa. La conseyería incorporó sistemes dixitales d’información y control nos cinco puertos de monte con riesgu d’ádenes: Tarna, San Isidro, Somiedu, Ventana y l’accesu a Sotres. El dispositivu global, vixente hasta’l 30 d’abril, moviliza a 115 persones, 35 quitanieves y ocho fresadores, ente otros medios. Actualiá
Al respective de los medios técnicos, el plan cunta con una flota de 35 quitanieves, ocho fresadores y otros equipos especializaos, como un touterrén forníu con cuña, pala cargadora con fresa, furgones y furgonetes de sofitu, un camión-grúa y otra góndola. Estos recursos tán distribuyíos en nueve zones per tol territoriu, anque con prioridá para les árees de mayor altitú y riesgu. La rede autonómica suma 374 kilómetros de víes allugaes a altitúes cimeres a los 800 metros, de los cualos 175 asítiense percima de los mil.
El dispositivu cunta, amás, con 15 silos d’almacenamientu de sal, distribuyíos estratégicamente, con capacidá para 1.130 tonelaes.
Per otra parte, la rede d’estaciones meteorolóxiques facilita’l siguimientu de les condiciones atmosfériques en tiempu real, lo que favorez una rápida reacción énte cambeos sópitos de les condiciones ambientales.
• Protocolu d’actuación
El protocolu d’actuación énte situaciones de riesgu y emerxencies meteorolóxiques establez cuatro escenarios que definen la intensidá de la respuesta: peligru baxu (nivel 1), peligru moderáu (nivel 2), peligru altu (nivel 3) y peligru bien alto (nivel 4).
Empresta especial atención a les víes con alta probabilidá d’ádenes, como l’accesu a Sotres (AS-264) y los puertos de Tarna (AS-117), San Isidro (AS-112), Ventana (AS-227) y Somiedu (AS-228).
Les midíes cordínense en función del nivel de peligru d’ádenes, pa lo que se tomen en considerancia les alertes de l’Axencia Estatal de Meteoroloxía y los avisos de nivólogos y observadores de campu. Cuando s’afiten niveles de peligru altu y bien alto, la Dirección Xeneral d’Infraestructures va dar avisu al 112 y va proponer el zarru de les víes afectaes a la Central Operativa de Tráficu (COTA), que va ser l’órganu que tome la decisión definitiva.
La Conseyería de Movilidá, Mediu Ambiente y Xestión d’Emerxencies recuerda a la ciudadanía la importancia de siguir los encamientos de les autoridaes énte les situaciones meteorolóxiques adverses.
