Bonos díes a toes y a toos:
Un añu más tamos equí aconceyaos pa celebrar l’amagüestu,
la folixa más típica de la seronda asturiana, del otoño.
Una estación de transición marcada pol tresformamientu
del paisaxe, el clima y la lluz. Una de les estaciones más guapes.
Los árboles pierden les fueyes verde en favor
de vibrantes tonos mariellos, naranxes y acolorataos
enantes que les fueyes cayan. La naturaleza vístise de gala
con una paleta de collores templaos y vibrantes.
Los montes cúbrense d’un mantu de fueyes
que crean un paisaxe impresionate
antes de ser barríes pol vientu y l’agua.
Anguaño’l tiempu nun mos acompaña. Fai abondo frío
pero ello nun quita que nos axuntemos,
sintámonos arropaos y podamos celebrar como se merez
l’amagüestu, la fiesta típica asturiana serondiega.
Antes del recréu probamos yá les castañes y la sidra duce
nel aula. Agora, equí, toca esfrutar del actu más cultural.
Esti cursu escolar el tema de trabayu de los proyectos,
a nivel de centru, ye: “L’arte na tierrina”. Esti trimestre,
en concretu, estudiamos en tolos niveles y ciclos
como arte que yé con mayúscules «La música».
Una temática bien guapa onde ponemos en valor
la nuesa cultura. Investigamos sobro compositores
y cantantes asturianos de distintos estilos y ritmos.
Recordamos a quienes llucharon porque instrumentos
tradicionales mui nuesos como la gaita, por casu,
nun sumieren y siguieren sonando.
Gaites, tambores, panderetes, panderos, curdiones,
turullos, castañueles, … por nomar dalgunos.
Una temática perguapa pa cantar y celebrar,
pa conocer meyor tamién, amás del castellán,
les nueses llingües propies: l’asturianu y l’eonaviego,
arrequexáes y denostaes n’ocasiones.
Sentímonos bien arguyosos de ser el centru educativu d’Asturies
con mayor matrícula n’asturiano, con 372 neños y neñes, un 57 %.
Volviendo al tema, la música… Ye un arte qu’ufiértanos
una montonera de beneficios a les persones,
incluyendo un garrapieyu de coses bones
como más memoria, concentración y meyora nel llinguaxe,
habilidaes motores (equilibriu, motricidá fina) y bientar emocional.
La música ye una ferramienta bien útil pal aprendizaxe de conceutos
académicos como por exemplu de matemátiques y ciencies.
Eso ye. Escuchar música aumenta la producción
d’una sustancia llamada serotonina nel celebru,
lo que contribúi a ameyorar l’estáu d’ánimu,
aumentar l’autoestima y la sociabilidá,
amenorgar el estrés, promover una sensación de bientar,
de felicidá, relaxación y equilibrio emocional.
Asina que, por toos estos beneficios
y pa poder combatir el frío que fai,
solo nos queda esfrutar d’esta folixa
compartiendo unos cantares con Anabel Santiago,
invitada d’honor.
Anabel, arxentina de nacimientu y de descendientes
asturianos, vive n’Asturies dende los 4 añinos.
Ye una de les voces más destacaes na música
asturiana d’anguaño, sobremanera la tonada.
Nel barriu de La Corredoria tenemos la cai Anabel Santiago,
una calle col to nome, mui cerquina de la Plaza Xuanín de Mieres.
Anabel, esperamos que te preste la visita al nuesu colexu,
qu’esti alcuentru seya un momento perguapu pal recuerdu,
pa la posteridá.
De xuru pa estos neños y neñes uvieínos
quedará grabáu na so memoria.
Milenta gracies por venir. Va prestanos muncho
acompañate y echar unos cantares contigo.
Esfruta tamién d’esta folixa con nós. GRACIES!!!
Sentimos muncho qu’otra artistaza, Vero Rubio,
nun pueda acompañanos y deseamos qu’ameyore.
Milenta gracies por acompañanos y brindanos
tiempo de calidá, tamién, a Jony y Arancha,
los pas de Daniela, alumna de cuartu de Primaria.
Gracies por apurrinos la vuesta música
cola gaita y curdión. Esperamos que tamién vos preste,
una vegada más…
Milenta gracies a Dany, pá de Daniel de cuartu de Primaria,
pol montaxe téunicu pa que too esto seya posible. GRACIES!!
Bono, pues entós…. Qu’entame la música y la folixa…
Viva l’amagüestu,
Puxa’l cole Carmen Ruiz-Tilve,
Puxa Asturies
