Un 7 de payares de 2019 dexábanos Margarita Salas.

Pero la so lluz, la so voz sele y el so amor pola ciencia siguen emponiendo cada pasu que damos. Foi una muyer qu’abrió caminos onde malapenes esistíen, que demostró que la ciencia tamién puede faese con tenrura, con paciencia y col fondu convencimientu de que conocer ye compartir.

Margarita creía nel poder de la conocencia para tresformar el mundu, y el so legáu güei multiplícase en cada neñu y cada neña que se pregunten el porqué de les coses, en cada mozu que s’atreve a investigar, en cada maestru qu’enseña a mirar con interés.

Dende la Fundación Margarita Salas, trabayamos por que’l so exemplu siga vivu: inspirando, educando y espertando vocaciones científiques en tolos rincones. Porque recordar a Margarita nun ye mirar al pasáu, sinón siguir el so camín. Videu

Margarita Salas Falgueras (Canero, Asturies, 30 de payares de 1938-Madrid, 7 de payares de 2019) foi una destacada bioquímica española. Llicenciada en Ciencies Químiques pola Universidá Complutense de Madrid, collaboró con Severu Ochoa nos Estaos Xuníos y Alberto Sols en Madrid.

Les sos contribuciones científiques inclúin la determinación de la direccionalidad de la llectura xenética y el descubrimientu y caracterización del ADN polimerasa del fago Φ29 (enzima que sintetiza ADN y provien del bacteriófago Φ29), que tien múltiples aplicaciones biotecnológicas por cuenta de la so peralta capacidá d’amplificación del ADN.

Trabayó nel Centru de Bioloxía Molecular Severu Ochoa de Madrid, onde siguió investigando’l virus bacteriófago Φ29. Salas perteneció a prestixoses sociedaes científiques, recibió múltiples galardones, dirixió l’Institutu d’España (organismu qu’arrexunta a la totalidá de les Reales Academies Españoles) y presidió la Fundación Severu Ochoa. Amás, foi la primer muyer española en ser miembru de l’Academia Nacional de Ciencies d’Estaos Xuníos en 2007.

El so legáu inclúi importantes descubrimientos en xenética y biotecnoloxía.