Tarde en danza. La xornada remata’l sábadu 22 a les 20.30h con una Tarde en Danza na qu’actúen el grupu de pandereteres d’Escontra’l Raigañu y la directora de Muyeres y veterana de la música tradicional asturiana nel oriente’l país, Marta Elola, col so proyectu Arella. Nesta actividá que tamién ye nel Centru Sociocultural de Llaranes va haber sidra’l duernu, castañes magostaes y dulces de calabaza.
Tres del éxitu de la XXII Seronda d’Avilés celebrada hai unes selmanes, Escontra’l Raigañu continúa coles sos actividaes pa da-y puxu a la cultura de raigañu. Esta selmana Llaranes acueye’l XI Filandón nel que va haber una visita guiada a l’Aula Didáutica de Cultura Popular Asturiana, charres y alderiques al rodiu la indumentaria tradicional anguaño y una Tarde en Danza con les pandereteres d’Escontra’l Raigañu y el proyectu Arella de Marta Elola.
«Igual que naquellos tiempos en que la filandera d’una casa convidaba a otres muyeres a xuntase pa filar y en cuanto enterábense allegaben tamién los mozos a la cita y aquello convertíase nun actu social pa pasalo bien, güei, nel sieglu XXI, faciéndonos ecu del espíritu d’aquellos filandones, queremos convidavos a participar nes actividaes que van faese nesti XI Filandón. Un espaciu nel que deprender sobro los nuesos usos y costumes dende una mirada actual«, presentaron Escontra’l Raigañu en redes sociales en rellación a estes xornaes nel qu’afirmen que va haber «momentos pa escuchar y aldericar sobro temes interesantes y otros momentos más folixeros pa baillar al son de la pandereta, del acordión…, mientres comes unes castañes magostaes con un vasín de sidra’l duernu».
La programación arranca esti martes 18 a les 19h cola visita guitada Formes de vistir, maneres de vivir a l’Aula Didáutica de Cultura Popular Asturiana, que va repetise a la mesma hora’l xueves 20. D’otra banda, el vienres 21 el Centru Sociocultural de Llaranes acueye la charra-alderique La indumentaria tradicional nel sieglu XXI na que participen Sergio Velasco, Maite Reigada y Llucía Miravalles, con moderación de Fe Santoveña. Llucía Miravalles, creadora y responsable de la marca Ringo Rango tamién va dar una charra’l sábadu 22 a les 19h entitulada Ringo-Rango, nueves creaciones y usos de la tradición.
