El Raitán européu (Erithacus rubecula) o Raitán como lu llamamos n’Asturies, ye para mi’l paxarin más dondu que conozo. Añedo la información SEO sobro’l pequenu Raitán. Fonte: Vida Cantábrica /álbum: Petirrojo europeo
Paxarucu de constitución gordosa, sobremanera pel hibiernu, cuando acovana les sos plumes pa xenerar una capa d’aire caliente interior. Machos y femes son idénticos en coloración. Nel so plumaxe destaca l’ampliu llurdiu anaranxáu que s’estiende pola cara, el gargüelu y el pechu, que apaez bordiada por una irregular y sutil banda gris. El restu del plumaxe resulta poco vistosu. Apoderase’l color pardu verdosu nel envés y les nales, y el blancu puercu nel banduyu.
Los mozos volantones, antes de la muda parcial a finales del branu, amuesen un plumaxe pardu, con casi toles sos plumes puntiaes nel so estremu con llixos amarellentaos. El raitán européu muévese davezu pel suelu en busca d’insectos. Pa cantar pósase nes cañes altes de los árboles, yá sía pel hibiernu o mientres la temporada de cría.
Ye bien agresivu, tanto con exemplares de la so mesma especie como col restu de les aves, non solo na dómina reproductora, sinón tamién mientres la ivernada. Nesti últimu periodu, les pareyes dixébrense y defenden territorios individuales.
