- Alborecemos col cielu nuboso de nubes medies y altes ya con unes temperatures condicionaes pol vientu ábrigu, ellí onde tenemos abellugaos d’él son fríes, perdebaxo de los 5ºC ya onde non, llegan hasta los 15ºC, rexistrándose nel puirtu Payares 2,2ºC.
- Güei vamos tener nubosidá media-alta que sedrá más abondosa pela tarde cuando nun se descarten delles precipitaciones febles. Les temperatures subirán dalgo pero non muncho y l’aire ábrigu pue soplar con dalguna racha fuerte pela mañana nes zones favoretibles.
- Mañana martes sedrá un día pasáu per agua con precipitaciones xeneralizaes ya persistentes que puen tener calter moderáu con unes temperatures en descensu ya cola nieve que surdirá perriba de los 1400m, sobre too pela mañana con tendencia a remitir al finar el día. L’aire gallegu pue soplar con dalguna racha moderada nes zones espuestes.
- El miércoles ya xueves tendremos nubes ya claros o abancios con temperatures fríes peles nueches y paez que’l vienres torna la lluvia y suben dalgo les temperatures.
Anque entovía queda muncho tiempu pa facer una previsión de cara a les fiestes navidiegues , too a punta a que sedrán fries, pero esto yá lu diremos viendo.
