- El Tiempu n’Asturies.
- Perguapa felicitación que mos manda Tomás García dende la Ivernal.
- Alborecemos col cielu nuboso y precipitaciones febles ya con unes temperatures que tan alrodiu de los 7ºC, rexistrándose nel puirtu Payeres -0,4ºC.
- Güei vamos tener el cielu mui nuboso con precipitaciones febles pero que puen ser persistentes, sobre too pela tarde cuando entamará a entrar aire fríu y baxar les temperatures, mentantu pela mañana la masa d’aire sedrá dalgo más cálida qu’estos díes anque malpenes lo vamos a notar, solo nos puertos de montaña que durente unes hores estarán en positivu pa tornar a baxar a baxu ceru pela tarde. L’aire sedrá sele del norte-nordés.
- Mañana xueves vamos tener un día mui fríu, probablemente’l Nadal más fríu de la última década que tampoco ye que faiga falta munchu, jijijj. Durante la mañana va tar el cielu mui nuboso ya tendremos precipitaciones de retención que sedrán febles ya intermitentes, sobre too alrodiu de los cordales montañosos y sedrán de nieve tan solu perriba de los 300-400m. Yá pela tarde dirá escamplando y xelando antes que camude’l día. L’aire sedrá del norte-nordés sele en xeneral, pa quedar variable al finar el día.
- El vienres alboreceremos a baxu ceru na mayor parte d’Asturies y col cielu escampláu, la llume del sol calecerá dalgo al mediudía ellí onde entre, nel restu seguiremos teniendo un ambiente mui fríu.
- El sábadu y domingu va tar poco nuboso o escampláu con xelaes nuecherniegues, sobre too en zones d’iversión onde puen ser moderaes. A primera hora de la tarde yá algamaremos los 10-11ºC pero al atapecer baxando de nuevu rápidamente.
- Hasta nueche vieya’l tiempu sedrá pareciu, con escasa nubosidá y xelaes nuecherniegues con ambiente fríu pero seliquino, a partir de añu nuevu hai posibilidaes de que mos afeute una masa d’aire mui fríu viniente d’Europa onde por mor del bloquéu anticiclónicu sobre l’Atlánticu d’estos díes va dir basculando parte del vórtice polar sobre élla. Yá lu diremos viendo.
Que paséis unes felices fiestes collacies ya collacios y que polo menos estos díes la bona xentea como vosotres carguéis l’ambiente de bonos sentimientos y paz.
