Cordelia Pickford (web /portfoliu / IG) dibuxa’l «skyline» de Grau: l’artista pinta’l perfil de la villa moscona alliniando dalgunos de los sos edificios más destacaos. Escueye’l Palaciu Miranda- Valdecarzana, el Conceyu o El Capitoliu: «Les cases d’indianos son maraviyoses para ilustrar». LNE
«Skyline» ye un términu inglés que lliteralmente se puede traducir como «llínea de cielu». Constituyenlo los edificios más altos d’un llugar, que dibuxen un perfil destacáu de normal d’una gran ciudá. Pero les localidaes más pequenes tamién pueden tener el suyu, afaciendo’l conceutu a la composición que conformen los elementos patrimoniales más sobresalientes d’un pueblu. Y Grau tien unu, como otros munchos rincones del Principáu, gracies a les ilustraciones de l’artista Cordelia Pickford, axuntaes nun llibru que lleva por títulu «Cuadiernu de viaxe per Asturies», con testos de Pablo Flaire. Nel casu de la villa moscona, la so arquitectura indiana llamó l’atención de l’autora al pie de otros inmuebles que son seña d’identidá local.
Panorámica personal de la villa Conformen la composición que creó para Grau’l Palaciu Miranda-Valdecarzana, see de la Casa de Cultura, la Capiya de los Dolores, el palacete d’El Capitoliu, el Conceyu y el so edificiu amiesto, la ilesia parroquial y el quioscu de la música. Al amosalos col so singular estilu de pintar, xuntos, dibuxaos unu al llau del otru, llogró una panorámica personal de la capital del conceyu que llama a visitala a quien nun la conoza. Podría haber otros elementos na composición, pero’l formatu tamién ye llindáu y l’artista hai d’escoyer ente tolo que vio al visitar la localidá.
«Nel casu de Grau, como nel de Colombres tamién, les cases d’indianos son maraviyoses pa ilustrar, polos sos colores, la so hestoria y la so estética tan estremada», esplica Pickford preguntada por cómo se desenvolvió la creación sobro la villa.
La obra de Pickford sobro Grau. / C. P.
«El procesu creativu tantu pa este ‘skyline’ como nel restu de la colección, empieza con una fase d’investigación qu’inclúi visitar el sitiu, y sobremanera cuntar cola ayuda de la mio editora Ana Raspia pa repasar los monumentos, edificios, llugares qu’ilustro, por que nun se m’escaeza nada importante», indica. Dibuxa a mano, usando tinta, dixitalizando depués les ilustraciones pa esti casu del llibru.
Pickford nació n’Inglaterra en 1995, pero pasó la mayor parte de la so vida en Llanes. «Viaxo enforma, pero soi del oriente asturianu y, por tanto, conozo perbién esta zona. Pero con esti proyectu empecé a afayar tamién el centru y sobremanera l’occidente, qu’apenes lo conocía. Y llevé la sorpresa de que lo que podría ser un proyectu más monótonu y repetitivu, gracies a la gran variedá qu’hai nel Principáu a nivel paisaxísticu, cultural y arquitectónicu, dio llugar a una colección bien variada pero unificada pol conceutu de ‘Asturies», señala.
Orde xeográficu y temáticu
L’artista trabayó asina por tola rexón y buscáu «una estructura y un orde, tanto a nivel xeográficu, pa tratar de representar de la manera más equilibrada posible tol Principáu, como a nivel temáticu: mariña, interior, arquitectura prerrománica, industria minero, faros, monumentos relixosos, ríos, monte, folclore, gastronomía, cultura, hestoria…», destaca sobremanera lo que se ve nel llibru, editáu por «Delallama Editorial».
Señala que los «skylines» o perfiles de conceyos son ilustraciones que nun busquen una resultancia realista, «sinón un colax llineal, en tinta, de los llugares más emblemáticos de cada zona». Sía que non, nel de Grau, como de xuru asoceda colos d’otres zones, llogró xuna obra d’altor que perfila’l patrimoniu del que más arguyosos tán los moscones.
