Va ser un día bien inestable con precipitaciones que van afectar a tol Principáu. Tantu pela mañana como pela tarde prevense cielos bien nublos que van dexar agües que podríen aportar a localmente moderaes y, inclusive, persistentes. La metá oriental va ser la más afectada rexistrándose, previsiblemente, les mayores cantidaes. La cota de nieve va bazcuyar ente los 1200 o 1300 metros anque na recta final del día va xubir hasta los 1500 o 1600 metros. Los vientos van soplar de componente oeste moderaos con raches fuertes na mariña y tamién nel sector occidental.
L’Axencia Estatal de Meteoroloxía va tener activáu l’avisu mariellu hasta les 10 hores de la mañana na mariña por foles d’hasta 5 metros y, a partir d’esa hora, el nivel va pasar a naranxa mientres lo que reste de xornada por foles d’hasta 6 metros.
Les temperatures máximes van caltener ensin cambeos ente que les mínimes van xubir en toa Asturies.
El vienres el día va ser más estable anque nun se refuguen dellos bastios escontra’l terciu oeste y nel cordal. Los vientos van predominar de suroeste moderaos con posibilidá de dalguna racha fuerte. Les temperatures van xubir nel casu de les máximes más de 5 ºC en comparanza coles del xueves. Les mínimes tamién van xubir en tola Comunidá Autónoma. Les foles entá podríen algamar los 4 o 5 metros mientres el vienres (avisu de nivel mariellu).
