Atopamos una umbada nel Atlánticu norte y un anticiclón nel norte d’África. Ente ellos forma un pasiellu de vientos de suroeste qu’arreciarán con cierta fuerza nel cordal, mariña y tamién nel sector occidental asturianu. Gracies a estos vientos les temperatures máximes van esperimentar un importante ascensu. Concretamente, van xubir más de 5 ºC en tola rexón pudiendo ser l’ascensu d’hasta 8 ºC respectu al xueves. Les mínimes van esperimentar llixeros ascensos nel occidente y apenes van variar nel restu del Principáu. En cuanto al estáu de los cielos, esperamos nubosidá con una mayor probabilidá de precipitaciones cuanto más movamos escontra l’oeste y escontra el sur de la Comunidá Autónoma. Asina tou, nun se refuga que pueda escapase dalgún bastiu n’otros puntos de la rexón, más probablemente pela mañana. Mientres tol vienres va tar activáu l’avisu mariellu na mariña por foles d’hasta 5 metros d’altor.
El sábadu va ser otra xornada marcada polos templaos vientos de suroeste que volverán xubir les temperatures máximes y, nesti casu, especialmente les mínimes. Los cielos van presentase con intervalos de nubes medies y altes. L’avisu na mariña por aguaxe va ser de nivel naranxa a partir de les 8:00 hores de la mañana por foles d’hasta 6 metros. Esti avisu va enllargase mientres tol sábadu.
